- 6 у спектакльым шындыме, 226 спектакльым модмо.
- Спектакльым чылаже 32 500 наре еҥ ончен.
- Интернет гоч вияш эфирыште колтымо 12 спектакльым да ик концертым 473 еҥ ончен. Театрыш толын огыда керт гын, У ий пайрем кечылаштат южо спектальым тиде йӧн дене ончен кертыда. Тидлан сайтын афишышкыже пурыман.
- Интернет гоч 4700 билетым налме.
- Театрын сайтышкыже 220 тӱжем наре гана пурмо. Артист-влакын лаштыкышт коклаште эн шукыжо Марина Воронцова нерген лудыныт да онченыт.
- Пушкин карт дене 3 000 утла самырык еҥ спектакльым ончен.
- Ик ончышо тиде карт дене 14 гана Шкетан театрыш толын. Павел, тый чын йолташ улат! Тыланет – У ий пӧлекна.
- Вес кундемла гыч толшо 1400 турист уна лийын.
- Чыла пашаеҥ, кӧлан COVID-19 прививкым шындаш лиеш, тидым ыштеныт. Теат шкендам аралыза!
- ВК группына 8 891 подписчикым уша.
- Качери бавайна группыштыжо 13 тӱжем еҥым ушен шога.
- Эн шуко еҥ «Ава капитал» (3 380) ден «Короткий день» (3 784) спектакльлашке толын.
- «Ший Пампалче» спектакльым Дарина лӱман ӱдыр 6 гана ончен! Кушкын шумекыже, тудо Пампалче гай мотор да мурен моштышо лийнеже.
- Роман Алексеевын шындыме «Бавай» спектакльыште зритель идалык мучко койын ешаралт шога. Ала-можо уло витне тиде чапле пашаште.
- Роман Алексеевын шындыме «Илена-йӱлена» спектакль Марий Эл Республикын кугыжаныш премийжым налын. Ончыде-палыде ида код!
- 100 утла ял ден поселкышто, тугак Волжск, Звенигово, Казань, Козьмодемьянск олалаште спектакльым ден концертым ончыктымо.
- Артист-влак районлашке да вес регионлашке спектакль ончыкташлан 100 000 километр утла корным эртеныт, тидлан 4000 литр утла дизель ден бензин каен. (тиде Мланде шарым экватор дене 2,5 гана савырнен эртыме дене иктак).
- Сценылан вургемым, декорацийым ямдылаш 3242 метр тӱрлӧ куэмым кучылтмо.
- «Эн сай марий пьесе» конкурсыш 12 пьесе пурен.
- Тений театр ик качымарийым «йомдарыш»: Генрих Тимиряев ӱдырым нале. Тыгодымак ик мурызо ешаралте: Генрих Тимиряев икымше гана солист семын сценыш лекте.
- «Маринавт-влак» спектакльлан деркорацийым ямдылашлан 8 000 пластик совла каен.
- «Ава капитал» спектакльна юзо куатан, витне. Тудым шындаш тӱҥалме жап гыч 5 артисткына азам ыштен!
- Идалык мучко 50 пачке кагазым «возен» пытарыме. Кугурак ужашыже бухгалтерийлан логалеш: отчётым ышташ.
- Ургызо цех тӱнялан палыме марий патыр да актер Олег Тактаровлан «Не Иван или как приручить богатыря» фильмыште модаш марий тувырым ыштен пуэн!
- Ургызо цехыште тӱрлеман 53 салфеткым, 4 солыкым, 65 аралтышым, 15 эмблемым, 2 курчаклан вургемым, 22 подвескым, 2 скатертьым ямдылыме.
- Шкетан театрын артистше-влак 18 у мурым сценыш калык ончыко луктыныт.
- Театр буфетыште 12 678 когыльым кочмо, 8 385 корка чайым але кофем йӱымо.
- Тений фойеште у У ий кожым шогалтыме. «Плёс» фирме ден тудын вуйлатышыже Сергей Воронцовын полшымыштлан тау! Кожыш 77 шарым сакыме. Ӱшанымыла ок чуч? Толза да шкеак шотлен тергыза.
Шкетан театр 2021 ийыште (чын ден мыскара иквереш)
