Россий Президентын 2025 ий 5 майысе 279-ше номеран указше дене М.Шкетан лӱмеш Марий национальный драме театрын художественный вуйлатышыже Василий Александрович Пектеев «За труды в культуре и искусстве» медаль дене палемдалтын. Тыге аклыме тудын культур да искусство аланыште кужу жап кугу лектыш дене ыштыме пашажым.
Марий Эл искусствын сулло деятельже В.А.Пектеевын пӱтынь паша корныжо театр дене кылдалтын. 1980 ийыште Ленинградысе Театр, музыка да кинематографий институтым режиссер семын тунемын пытарыме деч вара М.Шкетан лӱмеш Маргостеатрыште режиссерлан ышташ тӱҥалын. 1987 ийыште театрын тӱҥ режиссержылан шогалтат. 1992-2002 ийлаште, 2018 ий гыч таче кече марте — театрын художественный вуйлатышыже. Тыгак тудо Российсе шуко национальный театрыште спектакль-влакым шынден.
В.Пектеевын шындыме спектакль-влак тӱрлӧ фестивальыште сеҥышыш лектыныт. Пытартыш ийлам гына налаш гын, тыгай улыт «Окса тул», «Кӧ кечым пӧртылта», «Югорно» постановко-влак. Шкетан лӱмеш театрым таче Россий мучко палат, турлӧ фестивальыш ушнаш ӱжыт гын, тыште художественный вуйлатышын надырже кугу.
Василий Александровичым кугу награде дене шокшын саламлена да пеҥгыде тазалыкым, усталык пашаштыже эшеат кугу кӱкшытым тыланена.
