ЯНГАБЫШЕВ ВЛАДИМИР СЕМЕНОВИЧ (1940—2004),
Марий Элын сулло артистше (1992)
В.С. Янгабышев 1940 ийыште 4 мартыште У Торъял районысо Пеледыш ялеш шочын. 1957 ийыште Тошто Торъял кыдалаш школым тунемын пытарымекыже, кок ий Ошканер клубым вуйлатен. 1959 ийыште Республикысе культпросветучилищыш тунемаш пурен, тушто ик ий тунеммеке, 1960 ийыште Москосо А.В.Луначарский лӱмеш Кугыжаныш театральный институтыш тунемаш кая. Тудым 1965 ийыште пытара да М.Шкетан лÿмеш Марий кугыжаныш драма театрыште пашам ышташ тўҥалеш да уло ўмыржым тудлан пӧлекла.
Театрыште 35 ий пашам ыштыме пагытыште В.С.Янгабышев марий, руш, тÿнямбал драматургийысе пьесылаште ятыр тÿрлö рольым модын, шуко чапле образым чоҥен. Нунын коклаште — Эчук (С.Николаев, «Салика»), Эпанай Кори (М.Шкетан, «Эреҥер»), Садовин (А.Волков, «Кунам ломбо пеледеш»), Валентин (К.Коршунов, «Шочмо мланде»), Вöдыр (Н.Айзман, «Кай, кай Йыванлан»), Мичи (С.Чавайн, «Мÿкш отар»), Айваров (А.Волков, «Йорга вате»), Мамбет (Ч.Айтматов, «Шучко курык»), Сильвио (К.Гольдони, «Кок озан тарзыже»), Яков Лаптев (М.Горький, «Егор Булычев да молат»), Офицер (Островский, «Кузыкдымо ÿдыр»), Тарзе (В.Шекспир, «Латкокымшо йÿд»), Судья, Тоомас (А.Кицберг, «Ургызо Ыхк»), Жевакин (Н.Гоголь, «Каче пазар»), Похйола оза («Калевала»), Аксар (К.Коршунов, «Аксар ден Юлавий») да шуко-шуко молат.
В.С.Янгабышев шкенжым ÿшанле йолташ семын ончыктен. Садланак тудым коллективыште пагаленыт, тудо яндар да поян шÿм-чонан, уста айдеме лийын.
Тудын илышыже да творчествыж нерген возеныт:
Горохов В. Усталык корнышто (На пути к мастерству) // Ончыко. 1969. №6. С.92—97.
Георгина М. Марийский драматический театр: Страницы истории (1919—1978). Йошкар-Ола, 1979.
Георгина М. Сложный путь поисков // Марийская правда. 1982. 3 марта.
Ябердина И. Марий Элын артистше-влак: Владимир Семенович Янгабышев (Артисты Марий Эл) // Ончыко. 2001. №1. С.84—85.