М.Шкетан лӱмеш Марий драме театрын тыгай лӱман рок-оперым сценыш лукмыжым чынжымак усталык сеҥымаш семын ончыман. Драматический артист-влакын образым рок сынан муро полшымо чоҥымо практике пеш шагал вашлиялтеш. А мемнан актер-влак тидым ыштен кертыныт.
«Вий-ар – ме» спектакльым шындыше Карелий гыч режиссер Сергей Пронин мемнан театрын руппыжым сайын пала, садлан тудо пашалан лӱдде пижын. Тудлан кугу эҥертыш лийын сценым сӧрастарыме, волгалтарыме да вургем шотышто сӱретче Ирина Пронина. Музыкым Владислав Панченко возен.
Сценыште керде дене кредалме сцене-влак улыт. Кредалыт торжан, да тыглай бутафорский огыл, а кок кило нелытан керде дене. Тиде мастарлыклан актер-влак Александр Овчинников дене пырля тунемыныт.
Хореограф семын Ирина Володина тыршен.
Иктеш налмаште, театрын историйыштыже посна лаштык семын палемдалт кодшо чапле спектакль шочын. Уым кычалде, ала-куштыжо, можыч, тидым ыштен кертына гын-уке гын манме кокыте шонымаш денат, илыш дене тӧр ошкылаш огеш лий. Тыге гына театр деке калыкын кумылжым савыраш лиеш. «Вий-ар — ме», тудым сценыш лукмаште тыршыше-влакын шонымышт почеш, ик тыгай кугу паша, сай ошкыл.
{phocagallery view=category|categoryid=219|limitstart=0|limitcount=0|detail=3|displayname=0|displaydetail=0|displaydownload=0|displaydescription=0|displayimgrating=0}