М. Шкетан лӱмеш Марий драме театр тургымым петырыме деч ончыч, 19 апрельыште, калыклан эше ик у пашам ончаш темлыш. Тиде Михаил Хейфецын пьесыж почеш шындыме «Кузе гын марлан лекташ огыл?» спектакль.
Тудын жанржым «эксцентрический комедий» манын палемдыме. Чынжымак, пьесысе кок ӱдырамаш герой, аваж ден ӱдыржӧ, кӧргӧ чонышт дене тунар чымалтше улыт – тулым пӱргал луктыт, шонет. Кӱчык жапыште шкеныштын шонен пыштымыштым илышыш пуртышашлан мом гына шонен огыт лук, икте-весылан могай гына «спектакльым» огыл мод. Сценыште кок еҥ гына, но ончышо нунын ӱмбач ик татланат шинчам кораҥден ок керт – кажне шомакыштым колын, мом ыштымыштым ужын шуктынеже.
Рольым Марий Элын калык, РФ-н сулло артистше Маргарита Медикова, артист-влак Светлана Филиппова, Светлана Александрова, Марина Трутникова ямдыленыт. Икымше премьер годым С. Филиппова ден С. Александрова лектыныт. Ончышым нуно ӱшандарен кертыныт.
Режиссер-постановщик — Алексей Ямаев, режиссёр — Сергей Таныгин, вургем сӱретче — Лариса Воробьева, семым келыштарен — Светлана Яндукова.
