2021 ий 20 декабрьыште Марий Эл Республикын Кугыжаныш премийже нерген республикым вуйлатышын 219-ше номеран указше лектын.
Тудын дене келшышын, Театральный искусствышто М.Шкетан лӱмеш премийым Чаба Секейын «Цветок шахт» пьесыж почеш «Илена-йӱлена» спектакльым шындыше да модшо артист-влак сеҥен налыныт. Теве нунын лӱмышт:
Алексеев Роман Юрьевич – режиссер-постановщик;
Таныгин Сергей Иванович – художник –постановщик;
Асмаев Артем Михайлович – Иванын рольжым модшо актер;
Воронцова Марина Валерьевна – Илонкан рольжым модшо актрисе;
Иванов Акпарс Владимирович – Микайын рольжым модшо актер.
«Илена-йӱлена» — чынжымак тыгай кугу премийым сулышо паша. Тудо «Йошкар-Ола театральная» фестивальыштат сай могырым палемдалтын ыле. Коллегына-влакым сеҥымаш дене шокшын саламлена. Ончыкыжо эшеат кугурак кӱкшытыш шуаш тыланена.
Ончышо-влаклан палашышт: «Илена-йӱлена» спектакльым у ийыште февраль кыдалне ончаш йӧн лиеш. Репертуарнам сайтыште да соцкыллаште эскерыза.