Сценыште — «Маринавт-влак»

Маринавт-влак

Шкетан театрын ончышылан темлыме тиде спектакльжын кокымшо лӱмжӧ уло:  «Теве кушто илышет». Премьер 19 мартыште эртыш.

Пьесын авторжо драматург Зинаида Долгова фантазий шотан произведенийыштыже герой-влакым Тый-Той лӱман Сандалыкыш колта. Маринавт-влак ончылан раш задаче шындалтын: тушто илыш уло мо манын рашемдаш. Но корабль чыгынымылан кӧра нуно палыдыме кумдыкеш волен шинчыт. Тышеч действий вияҥаш тӱҥалеш.

Автор шке пьесыжым «йомаклан келыштарен, илыш нерген шонкалымаш» манын палемден. Чынжымак, герой-влак, мланде деч торлымек,  кенета тусо илыш-кучыш, шкеныштын койыш-шоктышышт, пӱртӱс дене, икте-весе кокласе кыл, шочмо  верын ямже, порылык, йӧратымаш нерген йодышым тарватат…

Спектакль произведенийын кӧргӧ содержанийже дене веле огыл, сценографий денат чот ойыртемалтеш. Тудым ямдылыме годым видеотехнологийын тачысе сеҥымашыжым кумдан кучылтмо. Тидыже ончышым чынжымак пуйто Сандалык кумдыкыш нӧлталеш, йомак тӱняшке наҥгая. Сценыште кок тӱрлӧ планетыште илыше-влак коклаште (иктыже -айдеме, весыже — пеле робот) йӧратымаш шижмаш ылыжмым эскераш йӧным пуа…

Спектакльым режиссер  Роман Алексеев шынден, художник-постановщик – Сергей Таныгин, композитор – Светлана Яндукова,  вургем сӱретче – Лариса Воробьева, мурылан мутым Зоя Дудина возен.  Роботын куштымашыжым Данил Кузнецов шынден.

Рольым модыт:
Ньо-Ньок – арт. Иван Соловьев
Лый-Лай – арт. Марина Воронцова
Шож-Вож – РМЭ-н калык арт. Сергей Данилов
Льыр-Льыр – РФ-н сулло, РМЭ-н кал . арт. Иван Смирнов
Пыль-Пыль – РМЭ-н сулло арт. Эдуард Яковлев
Льып-Льоп – арт. Алексей Сандаков.

Поделиться ссылкой:

© Шкетан театр - 2020

Top