Таче шке шочмо кечыжым Марий Эл Республикын калык артисткыже (1995) Венера Саввина палемда. Венера Гавриловнан усталык пашаже М.Шкетан лӱмеш Марий национальный драме театр дене чак кылдалтын. 1965 ийыште А.В.Луначарский лӱмеш ГИТИС-ым тунемын пытарымекыже, Марий театрын труппышкыжо ушнен. Тудын сценыштыже нылле наре ий модын, шӱдӧ утла рольым чоҥен. В.Саввинан геройжо-влак тӱрлӧ характеран, тӱрлӧ ийготан улыт. Кажныжым актрисе чонжо вошт колтен, кажныжлан ойыртемалтше тӱсым муын. Марий драматургий гыч «Аксар ден Юлавий» спектакльыште Юлавийын, «Мӱкш отарыште» — Клавийын, «Морко семыште» — Манюкын, «Окса тулышто» — Серапийын, «Саликаште» — Терей ватын образыштым поснак палемдаш кӱлеш. Режиссер-влак ты артисткым руш да тӱнямбал произведенийла почеш шындыме пашашкат кумылын ушеныт.
Шкетан театрын усталык коллективше да ончышо-влак лӱм дене тендам, Венера Гавриловна, 80 ияш лӱмгечыда дене шокшын саламлена. Пеҥгыде тазалыкым, кужу ӱмырым, волгыдо кумылым тыланена. Тендан дене ме кугешнена, Тендан пашада – самырык тукымлан пример!