М.Шкетан лӱмеш театрыште тиде кечылаште уло вийым «Вий-ар – ме» спектакльым ямдылен шуктымашке ушымо. Тудын премьерже 26, 27 апрельыште лиеш. Весымат каласыман, тудым театрын коллективше Марий талешке кечылан пӧлекла.
Е.Сойнин «Оставайся в Биармии» пьесыжым рок-опер жанр дене Карелий гыч режиссер Сергей Пронин шында. Норвегийысе саге-влаклан ӱшанаш гын, Биармий лӱман эл шке жапыштыже Белое теҥыз гыч тӱҥалын Урал курык марте кумдыкым айлен. Да тушто финн-угор калык-влак иленыт. Тиде поян элым руалтен налаш шонышо-влак эреак лийыныт. Лач викингмытын керылт пурымо нерген ойлалтеш ты пьесыште. Но Биармийыште илыше-влак шке мландыштым арален налыт. Кусарыше Геннадий Сабанцев, содержаний шот дене спектакльын лӱмжымат сайын келыштарен. «Вий-ар – ме»: вий – сила, ар – совесть, ме – мы.
Молан театрлан тыгай спектакль кӱлеш?
Тидын шотышто режиссер-постановщик Сергей Пронин тыге ойла:
— Национальный театрым шукынжо калыкын йылмыжым, йӱлажым аралыше семын ужыт. Ик могырым, тиде чын шонымаш. Но театр – тиде илыше организм, тудо ончыко вияҥшаш. А тидлан кызытсе зритель дене тудын йылмыж дене кутырыман. Ты могырым ончалмаште, Шкетан театр моткоч чын корным ойырен налын шонем. У ошкылым ыштыде, верыште кӱэмалт шинчаш лиеш. Ала-куштыжо, можыч, шӱртняшат логалеш, но ончыко каяш кӱлеш. Ме пьесым шындаш тӱҥалме деч ончычак тиде залыште эрла, кумышто кӧ шинчаш тӱҥалшашым шотыш налынна. Темлыме материал нунын дене кутыраш полшышаш.
А мо дене тиде спектакль ойыртемалтеш, да марий йылмым палыдыме еҥ тудым умылен кертеш мо?
С.Пронин:
— Тиде спектакльыште шуко муро йоҥга, тыгодымак сценыште действий виян кая. Тыгайже марий сценыште лийын мо – ом пале. А руш йылме дене кутырышо зритель шотышто теве мом каласем. Ме лу ий ончыч Карелийысе национальный театрыште тиде рок-оперым финн йылме дене шынденна. Мемнан ончышо кокла гыч 70 процентше – руш. Эскеренна: спектакль тӱҥалмеке икмыняр жап гыч еҥ-влак кусарыме аппаратым кораҥденыт да тугак онченыт. Ме либреттым ямдыленна, тудым лудын, сценыште мо ышталтме нерген умылаш лиеш. Сандене залыште шинчыше-влак семым ушештарыше йылмым, мурым колыштыт да действий эртымым эскерат. Рок-опер – тиде, содыки, кумда темым авалтыше эпический жанр. Тудо кӱкшӧ сцене гыч йоҥга. Тидым вес йылме дене кутырышо еҥланат ончаш оҥай да пайдале.
Тидын да шуко моло нергенат журналист-влакым репетицийыш ӱжмек мутланыме. Тушко Марий Эл Республикын культур, печать да калык-влакын пашашт шотышто министр К.Ивановат толын. Константин Анатольевич эксперимент шотан тыгай пашам сайлан шотлен.
{phocagallery view=category|categoryid=216|limitstart=0|limitcount=0|detail=3|displayname=0|displaydetail=0|displaydownload=0|displaydescription=0|displayimgrating=0}