Кодшо ий мучаште М.Шкетан лӱмеш театрын актрисыже Галина Иванова «Марий Элын сулло артистше» чап лӱм дене палемдалте. Тыге аклен кугыжаныш тудын сценыште коло вич ий ыштыме пашажым. Лач тидлан пӧлеклен Галина Александровна 3 мартыште эртарыме бенефисшым. Усталык каслан В.Матвеевын пьесыж почеш шындыме «Ава каПИтАЛ» комедийым ойырен налын.
Пытартыш ийласе репертуаржым ончалаш гын, тиде спектакльысе Проскан рольжо — актрисын ик эн кугу да оҥай пашаже. Нылымшылан аза пӧртыш толшо ялысе ӱдырамашын образшым Галина Иванова устан чоҥа, ончышо тудлан ӱшана. Тидым зал калык я воштылмыжо, я шинчавӱдым ӱштылмыжӧ, чӱчкыдынак совым кырымыж дене палдара.
Спектакль деч вара Галина Ивановам саламлаш еҥ-влак вӱдйогынла сцене могырыш тарванышт. Моткочак куандарыш шочмо Провой кундем калыкше. Район администраций, Керебеляк, Кужмарий, Шолеҥер… могыр гыч толшо-влак сценыш лектын шогальыч гын, чылт ӧрыктарышт. Кузе кугешнен моштат шкеныштын землякышт дене нуно!
Тиде кас, мутат уке, актрисым ончыкылык пашалан чот кумылаҥдыш, шке усталыкшылан да вийжылан ӱшаным ешарыш.
