Тидым 18 да 19 ноябрьыште эртыше премьерыш калык шыҥ-шыҥ погынымо раш ончыктен.
Тылеч ончыч Н.Арбанын тиде комедийжым Роман Алексеев 2009 ийыште шынден ыле. Тудын деке уэш пӧртылаш мо таратен? Тиде пьесым Марий кугыжаныш филармоний пеленсе «Марий кундем» калык семӱзгар оркестр дене пырля оперетте деке лишемден сценыш лукташ шонымаш.
— Труппышто сайын мурен кертше артист-влак улыт, тидак угыч ты материаллан пижаш сай амалым ыштен, — ойла режиссер Роман Алексеев.
Шонымо – ыштыме. Сценыште адакат Кугу сар деч варасе марий ял илыш, колхоз вуйлатышын амызе койышыжо, культурым нӧлтышаш верч тыршымаш да… йӧратымаш. Ольган рольыштыжо – Марина Воронцова, Санум Иван Соловьев модеш. Нине кок актёр сылне йӱкышт, чоным пыштен модмышт дене молгунамсе семынак ончышын кумылжым нальыч. Светлана Строганова (Тамара) тыгак виян йӱкшӧ, героиньым сайын шижмыж дене ойыртемалте. Эдуард Яковлев (Шумелев) ден артист Алексей Юнусов (Алгаев) оҥай куштымаш дене спектакльым сӧрастарышт. Чолга да мотор улыт Генрих Тимиряев (Мичуш) ден Кристина Лебедева (Катя). Андрей Бусыгин (Марка), Иван Смирнов (Одоким) да Светлана Филиппова (Ведаси) мыскара сцене-влакым пеш сайын келыштарат. Нунын деч посна тиде музыкальный комедий вес тӱрлӧ лиеш ыле.
Мутат уке, «Марий кундем» (вуйлатышыже А. Волков) оркестр тиде спектакльыште артист-влакын модмышт дене ик радамыште шога. Музыкант ден мурызо-влак икте-весым ваш шижын да умылен пашам ыштат. Тидын шотышто С. Яндукова кугу пашам ыштен.
Мотор декораций (художник И. Вильданов), сылне вургем (сӱретче Л. Воробьева), лывырге куштымаш (хореограф Г. Бахтерев) – чыланат сценыш чапле да кугу пашам лукмашке кугу надырым пыштеныт.
Спектакль пытымеке, калык кужу жап совым кырен, артист-влак дене пырля чылалан сайын палыме «Кеҥеж йӱд» мурым мурен. Тидат сеҥымаш нерген ойла.
