Йыван Кырла да сымыктыш йӱд

{phocagallery view=category|categoryid=285|limitstart=0|limitcount=0|detail=3|displayname=0|displaydetail=0|displaydownload=0|displaydescription=0|displayimgrating=0}

Театрыште кызыт «Йыван Кырла. Путевка в жизнь» спектакльым ямдылыме паша мучашке лишемеш. Мемнан землякна, поэт, киноактер Йыван Кырлан шочмыжлан 110 ий темме ийын самырык режиссер Степан Пектеев уэш тудын илыш да усталык корныж деке пӧртылын. 3 ноябрьыште театрыште эртыше Сымыктыш йӱд лач тиде темылан пӧлеклалтын ыле. Фойеште кугу выставкым вераҥдыме. Тушко газет лаштыклаште савыкталше материал, допрос протокол, Кырлан серышыже, тудын нерген шарнымаш, шуко фотосӱрет вераҥдалтын.
Тиде кастене тӱшкан «Путевка в жизнь» кинофильмым ончымо. Залыште тӱҥ шотышто самырык-влак шинченыт. Тидыже куандара. Тугеже кундемнан эртыше илышыже, мемнан ончылъеҥна-влакын пӱрымашышт нерген палаш кумылан улыт.
Шем-ош тӱсан тошто кино. Тудым 1931 ийыште сниматлыме. Но тудын тӱҥ ойыртемже – уло тӱнямбал кумдыкышто тиде йӱкан икымше художественный фильм. Да тушто тӱҥ, Мустафан рольжым мемнан землякна Йыван Кырла модын. Актер эсогыл марла шомак-влакым кучылтеш, марла мура. Тыгайым колын, шке калык дене кугешныме кумыл утларак ылыжеш. Посна сӱретым ончышыла, зал рӱж совым кырен.
Фильм тӱҥалме деч ончыч фойеште Grenz группын солистше Евгений Роднянский мурен. Тудо Кырла нерген спектакльым сем дене сӧрастара.