Тыгай лӱман книгам савыктен луктын Марий Элын калык, Российын сулло артисткыже Маргарита Медикова кодшо кечылаште. Тудын дене шочмо кечынже, 19 февральыште, СТД-ын залышкыже погынышо-влакым палдарен. А тиде шочмо кечыже тыглай огыл – Марий Элысе театр тӱняште ик эн волгыдын йӱлышӧ актрисе 55 ийым темен. Кумло кум ий тудо сценыште модеш, чоҥымо кажне образшын илышыжым илен лектеш…
«Молан возем?» — тӱҥалтыштак йодышым шынден автор. Да шкеак вашештен. «М.Шкетан лӱмеш марий драме театрысе йолташем-влак дене пырля кажне гана сценышке, келгын шӱлалтен, тургыжланен лектынам. Тыгодым чӱчкыдынак ончышемлан каласен шуктыдымо шомакым ойлаш кӱлмым шижынам. Таче кӧ тугай артист, кузе тудо ила, мом шона, мом йӱэш-кочкеш, мо дене шӱла – тидын нерген поро ончышемлан каласкалыме шуэш». Да тудо книгаште нине йодышлан вашмутым пуаш тырша.
Книга куд ужаш гыч шога. Тудо йоча пагыт гыч тӱҥалын, тачысе кече марте жапым авалта. Усталык паша – тӱшка паша. Артистат шкетын артист лийын ок керт. Тудо коллективыште пашам ышта, спектакльыште тудын партнержо-влак улыт, а илышыште – йолташыже. Маргарита Медикова, шкеж нерген возышыла, шуко актерым, режиссерым лудшын шинчаончыкыжо конда, аклен ончалаш тарата. Тиде книгаште тыгак тиде актрисе нерген возымо статья-влакым муаш лиеш.
Книгам почмеке вигак лудышым Маргарита Егоровна Иван Ямбердын сӱретлыме портретше дене вашлиеш. Тышке пеш шуко фотосӱретым пуртымо. Книга дене редактор семын Зоя Дудина пашам ыштен.
Книга кузе ышталтме нергенат, илыш да усталык корнысо посна йыжыҥ-влак нергенат М.Медикова залыш чумыргышо-влаклан радамлын каласкален, шке таумутшым ойлен. Да тудлан ойленыт. Ойленыт творчествыжым моктен режиссер ден писатель, актер, пырля тунемше йолташыже, ончышо-влак… Но эн шерге семын аклыман дыр театрысе самырык актер-влакын тауштымо шомакыштым. Акпарс Иванов, Марина Трутникова, Светлана Александрова, Марина Воронцова Маргарита Егоровнам театрысе ава дене таҥастарышт. Ава семынак тургыжлана, полша, туныкта, ушен шога нуным Маргарита Егоровна. Тиде тыгак лийшаш. Кугурак тукым кеч-куштат алмаштышым куштышаш.
Маргарита Медикован тиде кастене шкенжанат шомакше вӱдла йоген, йодышлан вашештен, почеламутым лудын…
А 2 мартыште юбиляр А.Островскийын пьесыж почеш шындыме «Чын улат сай, пиалан гын – сайрак» спектакль дене ончышо-влак дене вашлиеш. Нуныжо молгунамсе семынак зал тич лийыт манын ӱшанаш чыла амал уло.
{phocagallery view=category|categoryid=210|limitstart=0|limitcount=0|detail=3|displayname=0|displaydetail=0|displaydownload=0|displaydescription=0|displayimgrating=0}