26 декабрьыште театрыште Марий Элын калык писательже Вячеслав Абукаев-Эмгакым шарныме кас лиеш. Ила гын, 26 декабрьыште тудо 60 ийым тема ыле. Но лу ий ончычак шӱмжӧ кырымым чарныш.
Вячеслав пеш куштылго айдеме ыле, ошкылеш, пуйто йол йымалне мландыжымат огеш шиж. Пашамат тыгак ыштен. Марий сылнымутышто чыла жанр дене ик семын виян возен — почеламутымат, прозымат, драматургийымат, публицистикымат. Тудын йылмыже лывырге, поян, лудат – йылме нигушан ок тӱкнӧ, шомакше вӱдла йога.
Драматург-влак конкурсын жюри членже семын эше вес могырым чатка улмыжым шижынам. Шке пьесыжым кажне гана сайын папкыш урген пуа ыле (лийын такше тыгаят: район гыч почто дене толын. Ынышт пале манын, лӱмын тыге ыштен). Тидын шотышто тыгак Зинаида Долговам палемдыман. Нуно ик жапыште, марий манмыла, ӱчаш-ӱчаш возышт. Икмыняр пьесым лудмо годым тогдаяш лийын: тиде але тудо произведений Абукаевын але Долгован лийын кертеш. Сеҥышын ныл премийжымат нуно шукыж годым коктын пайленыт. Театр пашаеҥ семын пьесе-влакым жюри член деке лудаш Абукаев намиен пуэн. Но ик ганат, нигунамат ала мыйын верч йӱклет ыле манме шонымашым важымалдыкынат ойлен огыл. Тидын дене шкенжым пагалыме кумылым ешарен веле.
Вячеслав книгажым комын кӧргӧ могырешыже кӱчыкын сералтен пӧлекла ыле. Икмыняр предложений, но чон гыч лекше шомак да келге шонымаш. Уке лиймекыже тиде поснак шергыш савырныш. Теве, мутлан, «Вӱротыза» почеламут сборникыште возен: «Светлана, ме чылан вӱротызан улына, но тидын денак виян лийына да перке отызам ыштена! Тау эре улшо полыш кидетлан! 10.10.03.» Колымыж деч икмыняр жап ончыч редакцийыш толын ыле. «Палет,- мане тунам,- нойымемла чучеш. Витле ияш лӱмгечым палемдем да тушеч паша гыч каем, очыни». Но тиде кече марте пел ий наре ыш шу. Учрежденийыште пашам ышташ да тиде жапыштак сылнымутан произведенийым возаш – тиде могай неле улмым шке ыштен ончышо веле умыла. Театрын сылнымут пӧлкажым вуйлатышын шинчалан койдымо кырча-марча пашаже моткоч шуко жапым налеш. Тыште шке творчестве нерген шоналташат жап уке. Туге гынат М.Шкетан лӱмеш театрын репертуаржым Вячеслав Абукаев-Эмгак шуко сай пьесе дене пойдарен. «Ушкал йомын огыл» икымше пьесыже эше Марий кугыжаныш университетыште тунеммыж годым шындалтын.
Республикыште Марий самырык театр почылтмо дене самырык возышо-влак шкеныштым драматургийыште утларак чолган тергаш тӱҥальыч. Нунын коклаште иктыже лач Вячеслав Абукаев ыле. Тыге сценыш тудын «Шем оржан ош поран» трагифарсше, «Изуремыште кугу сӱан» комедийже, «Шӧртньӧ пӱкш» йомакше лектыч. А М.Шкетан театрын репертуарыштыже тиде авторын «Ош кече йымалне» (2002) драмыже ойыртемалтын палдырныш. Кок ий гыч «Куку шагат» драме ончышо еҥым тургыжланаш таратыш. «Кайыккомбо кашта» драме ончышым уэш Кугу сарым шанымашке пӧртылтыш. А теве «Алиса, Анфиса, Аниса» тачат сценыште кая. Тиде весела комедий кажне гана зрительым залыш шуко пога. Отпуск жаплан канаш толшо капитан пуйто мӧр олыкыш логалын. Кум ака-шӱжар кокла гыч иктыже – ончыч келшыме таҥже. Но кызыт вес коктыжат кумшо ранган капитанын чонжым савыраш тореш огытыл.
Лач тиде комедий дене Вячеслав Абукаев-Эмгакым 26 декабрьыште эше ик гана шарналтена. Тиде кастене писатель Василий Красновын вуйлатыме фонд «Ший памаш» конкурсым иктешла. Молгунамсе семынак тушто тӱрлӧ жанр дене возышо самырык сылнымутчо, тыгак журналист-влакым палемдат.
Светлана БЕЛКОВА.