Марий АССР-ын заслуженный артисткыже
1921 ий 11 июльышто Киров область, Малмыж районысо Кугу Кетек ялеш шочын.
1937 ийыште Кугу Кетек шымияш школым тунем лекмекеыже, Йошкар-Оласе театрально-музыкальный училищын актёр отделенийыштыже шинчымашыжым нӧлтен, артист мастарлыклан тунемын.
1941 ийыште Л.А.Булычёва Марий драма театрыш толын. Нылле ий жапыште тудо ончышо-влакым шуко чапле роль дене куандарен. Тудын чоҥымо образше-влак — Валя Борц (А.Фадеев, «Рвезе гвардий»), Акулина (Л.Толстой, Пычкемыш лоҥгаште»), Лиза (А.Островский, «Нужналык язык огыл»), Маргарита (А.Волков, «Илыш йолташ»), Ксения (М.Горький, «Егор Булычов да молат»), сокыр (А.Кицберг, Вувер ӱдыр») да шуко молат — артисткын кугу мастарлыше да усталыкше нерген ойлат. Любовь Афанасьевна шке пашажым уло чон дене йӧратен. Йолташыже-влак коклаште тудо поро, тыматле койыш-шоктышыж дене ойыртемалтын, самырык-влаклан каҥашым пуышо ӱшанле йолташ лийын.
Тӱҥ пашаж деч посна Любовь Афанасьевна калык театр, ялысе художественный коллектив-влаклан уло кумылын полшен шоген.
Артисткын суапле пашажым кӱкшын аклен, республикын правительствыже Л.А.Булычёвалан «Марий АССР-ын заслуженный артисткыже» лӱмым пуэн. Сар жапысе кугу пашажым шотыш налын, СССР Верховный Совет Президиум «За доблестный труд в Великой Отечественной войне 1941-1945 гг.» медаль дене палемден.
Любовь Афанасьевнан илыш-корныжо куштылго огыл лийын, но тудын илышым, шке пашажым йӧратыме кумылжо ӱмыр корныжым эреак волгалтарен шоген.
Илыш корныж ден пашаж нерген возеныт:
Гурьев Г. На спектаклях Марийского театра // Театр. 1951. № 10. С 56-63.
Георгина М. Марийский драматический театр: Страницы истории (1917-1978). Йошкар-Ола. 1979.
Горохов В. Нӧлталтше кумыл. Марий коммуна. 1969. 28 нояб.
Зайниев Г. Ӱмыр корнет, тӧрсыр корнет… // Кугарня. 1998. 20 февраль.
Белкова С. Жап чоҥешта кайык семын, вачышке возыт ий-влак // Марий Эл. 1998. 17 сентябрь.
Иванов С. Актриса — кызытат калык чонышто: Л.А.Булычеван шочмыжлан — 80 ий // Марий Эл. 2001. 28 июль.