Тыге лӱмдымӧ ыле М.Шкетан лӱмеш Марий драме театрыште эртыше У ий пайрем касым. Тушко тӱрлӧ вере пашам ыштыше чолга марий-влак погыненыт. Тыштак лийыныт Марий Эл Республикыште угыч чумырымо правительствын еҥже-влак — тиде правительстве председательын икымше алмаштышыже Михаил Васютин, правительстве председательын алмаштышыже-влак Степан Воронцов ден Юрий Сидыганов. Рудольф Григорьеват Волжский район администрацийым шукерте огыл вуйлаташ тӱҥалын. Тудымат у еҥ семын палемдыман. Ик премьерже дене пайремым касым почмо – тиде театр пелен шукерте огыл чумырымо ВИА. Тудын шке ойыртемже уло. Ударный ден струнный семӱзгар-влак йӱкыш шӱвыр, тӱмыр, шиялтыш да баян ушнат. Тиде моткоч сылнын йоҥга. Тиде кастенак В.Абукаев лӱмеш «Ший памаш» сылнымут фонд самырык возышо-влаклан премийым кучыктен, тиде кастенак шке у почеламутыштым лудыныт поэт-влак Геннадий Сабанцев ден Лидия Иксанова, у пашаже-влакым аклаш луктын сӱрет мастар Иван Ямбердов, у мурым пӧлеклен Светлана Строганова… Икте-весын пашаже дене палыме лийын, вашла шомакым вашталтен, сылне сем почеш вальсыште пӧрдын, У ийыште у сеҥымашым тыланен сайын каналтеныт погынышо еҥ-влак.