Марий Эл культурын сулло пашаеҥже Юрий Русановлан, ила гын, 15 майыште 55 ий темеш ыле. Но тудын кандаш ий ончыч ӱмыржӧ кӱрылтӧ. Вийвал пагытыште кайыш, ешыжым тулыкеш кодыш. Но тиде пӱтынь марий тӱнялан кугу йомдарымаш ыле. Юрий Русановын лӱмжӧ эн ончыч чолга самырык еҥ, келгын шонкален возышо журналист семын палыме лие. Тиде пашажым Марий Элын самырык-влаклан Олык Ипай лӱмеш кугыжаныш премийже дене палемдышт. Варарак тудо Марий самырык, М.Шкетан лӱмеш Марий национальный драме театр-влакын вуйлатышыже, Марий конгресс вуйлатыше, чолга мер пашаеҥ семын чапланыш. Шуко моло талантан еҥ семынак Юрий Русановын шӱдыржӧ марий каваште чот волгыдын йӱлен, вучыдымын йӧрыш.
55 ийым темыме кечынже Юрий Русановым шарнымашке шуко еҥ погынен ыле. Нунын коклаште родо-тукымжо, коллегыже, йолташыже-влак лийыныт.
Эн ончыч шӱгарӱмбакыже пеледышым пыштыме. Марий оньыжа Э.В.Александровын, Марий Эл Кугыжаныш Погын председательын алмаштышыже Л.Н.Яковлеван, Морко муниципальный район вуйлатыше С.М.Иванован, Марий самырык театрын художественный вуйлатышыже О.Г.Иркабаевын, драматург Г.Ф.Гордеевын, юбилярын йолташыже, театрын меценатше В.П.Воронцовын ойлымышт гыч Юрий Русанов уэш шинчаончыко тольо, тудын марий журналистикыш, тӱвыраш, мер илышым вияҥдымашке пыштыме надырже сӱретлалте.
Ю.Русановын Нурӱмал ял пошкудыжо-влак шке землякыштым шарныме кечын толшо уна-влакым пӧртшӧ ваштареш ӱстембаке чесым поген, гармонь почеш муралтен вашлийыч.
Вара Ю.Русановын тунемме Зеленогорский школ пырдыжысе Шарнымаш оҥа воктеке пеледышым пыштыме церемоний эртыш. Тушко верысе туныктышо коллектив да тунемше-влакат ушнышт.
Тылеч вара, программын радамже дене келшышын, Морко район тӱвыра пӧртысӧ изи залыште Русанов лудмаш конкурс тӱҥале. Тушко чылаже латшым еҥ ушнен. Нунын коклаште школышто тунемше, туныктышо, тӱвыра, медицине пашаеҥ-влак лийыныт. Нуным РФ-н сулло артистше, М.Шкетан лӱмеш театрын актрисыже Маргарита Медикован вуйлатыме вич еҥан жюри аклен. Ю.Русановын почеламутшо утыжым шуко огыл, но нуно келге содержаниян, чон гыч лекше да лудшым шонкалаш таратыше улыт. Мо оҥайже, вич конкурсант сцене гыч лудаш «Айдеме, молан тый тыгае улат?» почелемутым ойырен налын. Тидлан ӧршаш уке, вет автор айдемын чон яндарлыкше, лӱмжым кӱшнӧ кучаш кӱлмо нерген воза.
Жюри член-влак эн сайын лудшылан Моркысо икымше номеран школын тунемшыже Анна Яковлевам шотлышт (тудым туныктышо С.В.Никитина ямдылен). Тыгак сеҥыше радамыште Бочкарева Дарья, Григорьева Елена (2-шо вер), Федоров Александр, Иванов Николай улыт (3-шо вер). Нунылан конкурсын дипломжым, «Плес», деч пӧлекым, Марий сийгудыш абонементым кучыктымо. Ты кечын конкурсыш ушнышо кажне еҥлан шарнаш кодшо пӧлекым кучыктымо.
Конкурс деч вара актерын мастарлыкше шотышто да поэзий дене мастер-класс-влакым оҥайын эртарыме. Икымшышкыже республикыште сайын палыме режиссер Анна Якушева тӱҥалтыш класслаште тунемше да театр кружокыш коштшо йоча-влакым конден ыле. Елена Мочалова ден Алексей Юнусовын эртарыме мастарлык классым нуно кужу жап шарнаш тӱҥалыт, шонена.
А кастене калыклан М.Шкетан театрын ямдылыме кугу концерт программе дене калыкым куандырыме.
Юрий Русановым шарныме кечын программыже тичмаш налмаште моткоч поян ыле. Тудым ямдылымаште эн ончычак пелашыже Нина Геннадьевна да Морко районысо тӱвыра да образований пӧлка-влак тыршеныт.
