27 июньышто Морко районысо Ӱшӱттӱр ялыште «Айдемсе чон – кавасе шӱдыр» лӱман кугу концерт эртен. Тудо Марий Эл культурын сулло пашаеҥже, тале журналист, поэт, чолга мер пашаеҥ, Шкетан театрын ончычсо директоржо Юрий Русановым шарнымашлан пӧлеклалтын. Тудын уке лиймыжлан тиде кечылаште лу ий темеш.
Юрий Петрович журналистике гыч культурыш куснымеке, тиде аланыштат чон йӱлен пашам ыштен. Тудын нерген таче кечынат театр пашаеҥ-влак эн порын гына шарналтат. Шкетан театр марий калыкым ушен шогышо вер лийшаш – теве могай ыле тудын тӱҥ шонымашыже. Да тудым илышыш шыҥдарышашлан ни вийжым, ни жапшым чаманен огыл.
Усталык шӱлышан айдеме тиде жапыштак шкенжын творчествыжым вияҥден. Юрий Русановын почеламут корнылаже композитор-влакын чонышто муро семым шочыктеныт. Тыгай коклаште «Ӱдыр ӱмыр» (Татьяна Денисова мура), «Айдеме, молан тыгай улат» (Вильсур Хамеев) да молат улыт. Но автор шкеже Роман Алексеевын мурымыжым йӧратен. Роман Юрьевич «Йӧратем йӧратыде», «Кава шортеш» муро-влакым чынжымак уло чоным пыштен йоҥгалтара.
А теве Леонид Яндаковын пьесыж почеш шындыме «Йӧратымаш? Йӧратымаш! Йӧратымаш…» спектакльым пӱтынек Юрий Русановын мутшылан возымо муро-влак сӧрастарат. Тиде комедийыште ӱдыр ден рвезын, тыгак ийготым погышо ӱдырамаш ден пӧръеҥын чонышто йӧратымаш тул ылыжме нерген артист-влак пеш устан модыт. Тидлан нунылан муро полша.
Чыла тидым Ӱшӱттӱрыштӧ эртаралтше концерт годым эше ик гана шарналтыме. Спектакль гыч ужаш, артист-влакын шкет-шкет, тӱшкан мурымышт да куштымышт тиде кастене Морко кундемын тиде сылне кундемыштыже торашке шергылтын. Концерт деч ончычсо йӱрат лӱдыктен огыл, пӱртӱс аланыште келыштарыме сцене йыр калык моткоч шуко погынен да артист-влакым пеш шокшын вашлийын.
23 августышто тиде сценыштак М.Шкетан лӱмеш театр «Кавасе алаша» спектакльым моадш тӱҥалеш.
