«Тӱрлӧ жапыш тыманмеш вончена У ий вашеш» концерт программе дене М.Шкетан лӱмеш Марий драме театр 2025 ийым иктешлыш. А тудо шуко у спектакльлан, фестивальлан, тӱрлӧ кӱкшытан сеҥымашлан поян лийын. Тыгеракын, чылаже 7 у пашам сценыш лукмо, визытше — кугу сценылан, кокытшо — цех-заллан шындалтыныт. Теве нунын лӱмышт:
– «Кавасе алаша»/ «Небесный тихоход (А.Яковлев, С.Тимошенко, реж. Р.Алексеев);
– «Эрла ял пайрем» (З.Долгова, реж. В.Домрачев);
– «Чоҥешта турня кашта»/ «Вечно живые» (В.Розов, реж. А.Ямаев);
– «Колумб» (автор да режиссер В.Пектеев);
– «Каче пазар» (Н.Гоголь, реж. А.Ямаев);
– «Всеобъемлюще» (Н.Коляда, реж. О.Иркабаев);
– «Записки юного врача» (М.Булгаков, реж. Р.Алексеев).
Гастроль корнат кужу лийын. «Микулан – презе, Якулан – ӱдыр» музыкальный комедийым да «Богатырь из теста» йомакым Уфа (Башкортостан) олаште, марий-влакын тӱшкан илыме районлаште ончыктымо.
Фестиваль нерген ойлаш гын, тений утларак кугу кӱкшытан театр пайремыш ӱжмаш лийыныт. «Ваня чӱчӱ» спектакльым ондак М.Гафури лӱмеш Башкир академический театр дене пырля иканаште кок йылме дене Уфа олаште модмо. Тиде пашам «Науруз» фестиваль кышкарыште эртыше Тӱнямбал театр олимпиадыште (Казань ола), Тӱнямбал Александринский фестивальыште (Санкт-Петербург) ончыктымо. Тыгак тудо VII межнациональный «Сообщение» фестивальын (Кудымкар) репертуарышкыже пурталтын. Тушто Марий театрын пашаже Гран-при дене палемдалтын.
Шкетан театрын режиссержо-влак кугу кӱкшытан постановкым сценыш луктыт манмым моло сеҥымаш-влакат пеҥгыдемдат. Мутлан, «Кавасе алаша» «Театральный Йошкар-Ола» фестивальыште Гран-при дене палемдалтын. А Сергей Данилов «эн сай эпизод роль» номинацийыште лауреат лийын. Тиде фестивальыштак «Ваня чӱчу» спектакльыште Наталия Алексеева «кокымшо планан эн сай ӱдырамаш рольышто» сеҥышыш лектын. Светлана Скулкиналан жюри спецпризым пуэн.
«Чоҥешта турня кашта» спектакльын режиссержо Алексей Ямаев, актер-влак Павел Ефимов ден Людмила Казанцева Марий Эл Республикын М.Шкетан лӱмеш кугыжаныш премийжын лауреатше лийыныт.
Артист Эдуард Яковлевлан тений «Марий Элын калык артистше» лӱмым пуымо.
Театрын тӱҥ художникше Сергей Таныгин ден театрын художественный вуйлатышыже Василий Пектеевлан РФ Президентын Указше дене «За труды в культуре и искусстве» орденын медальжым пуымо.
Идалык мучко шуко моло мероприятий: бенефис, усталык кас, кава йымалне модмо паша – лийын. Нунын нерген ме сайтыште, соцсетьласе группылаште увертарен шогенна. Тыгак Марий Эл радиошто «Шкетан театрыште антракт» передачыште кумдан каласкаленна.
Эше ик кугу паша нерген увертарыман. Смартфонлан «Шкетан театр» приложений ышталтын. Тудым RuStore гоч шындаш лиеш. Тыгак Вконтакте группышто, театрыште вераҥдыме QR-кодым сканироватлен, телефонышкыда вераҥден кертыда. Тунам театр, спектакль, артист-влак нерген чыла уверым эн ончыч пален налыда. Билетымат тыште налаш йӧнан.
Пагалыме йолташ, шерге ончышына-влак! Шокшын-шокшын саламлена тендам У ий пайрем дене! Чылалан тумо гай пеҥгыде тазалыкым, кужу ӱмырым, ош лум гай волгыдо кумылым тыланена. Икте-весым пагален, шотлен, ваш-ваш эҥертен илыза. Ӱстембал чесда поян да перкан лийже. Оксалан, ешлан, йолташлан поян, пиалан лийза. У ийыште тек чыла шонымашда шукталтеш. У ий пайрем кумылда шампан арака семын ташлен нӧлталтше. У ий дене!!!
