Усталык кас

15 октябрьыште Россий Федерацийын сулло, Марий Эл Республикын калык артистше Олег Кузьминыхын 60 ийым темымыжлан пӧлеклалтше бенефисше лийын. Тидлан актер М.Шкетанын пьесыж почеш шындыме «Ачийжат-авийжат» спектакльым ойырен налын.

Кумло вич ий  жапыште Олег Кузьминых пеш шуко рольым ыштен. «Ачийжат-авийжат» тиде радамыште посна верым налеш. Тунем пытарен толмеке вигак Санум модын. Ынде ятыр ий Савлийын образшым чоҥа. Тиде пеш кугу да кӧргӧ вийым йодшо паша.  Олег Кузьминых моткоч ӱшандарышын   модеш.  Таклан огыл ты спектакльыш калык эре лыҥ погына. Тиде ганат тыгак ыле.

А спектакль пытымеке,  сценыш саламлаш кӱзышӧ моткоч шукын лийыныт. Нунын коклаште РМЭ культур, печать да калык-влакын пашашт шотышто министрын алмаштышыже М.Матвеев, М.Шкетан лӱмеш Марий драме театрын художественный вуйлатышыже В.Пектеев, СТД-н  секретарьыже Н.Пектеева, Самырык театрын художественный вуйлатышыже О.Иркабаев, артистын шочмо У Торъял районжо гыч толшо еҥ, ГИТИС-ыште пырля тунемше йолташыже-влак да шуко моло лийыныт. Чыланат артистын кугу мастарлыкшым палемденыт, тудлан ончыкыжо сценыште эше шуко рольым ышташ тыланеныт.

Вашешмутыштыжо Олег  Кузьминыхын тыге рӱжге погынен толмылан, тудын усталыкшым пагалымылан таум ыштен.

Поделиться ссылкой:

© Шкетан театр - 2022

Top