М.Шкетан лӱмеш Марий драме театр 14 октябрьыште ончышым эше ик у паша дене куандарыш. «Уш йоммеш йӧратымаш» (В.Красногоров) спектакльын жанржым режиссер Алексей Ямаев эксцентрический комедий семын палемден. Тудо тиде лӱмым чынжымак сула.
Сюжет, тичмаш налмаште, моткоч пӱсӧ тат да вучыдымо сӱрет-влаклан поян. Тыгайже врач-психиатрын кабинетыштыжак веле лийын кертеш манын ӱшанетак. Кӧ кӧм да мом уш йоммеш йӧрата — артист Павел Ефимовын геройжылан умылаш куштылго огыл. Пациентше да тудын кок «ватыже» докторым шкенжымак ушым йомдарышышке луктын кертыныт манаш лиеш. Эрыкым йомдараш лӱдмӧ годым, чынак, мом от ыште…
Тӱҥ рольым модшо П.Ефимов веле огыл, тыгак А.Тетерин, С.Сандакова, М.Трутникова, А.Юнусов ты пашаште артист семын йӧршеш вес шӧрын гыч почылтыт. С.Таныгинын декорацийжым стиль шотышто молгунамсе деч ойыртемалтше семын палемдыман.
«Уш йоммеш йӧратымаш» комедий театрын репертуаржым эше ик у сынан спектакль дене пойдарыш манаш келшен толеш.
