11 августышто М. Шкетан лӱмеш Марий кугыжаныш драме театр Морко районысо Марий Кужер ялысе клуб ончылно «Кеҥеж йӱд» музыкальный спектакльым модын ончыктен. Лач идалык ончыч артист-влак тыште «Морко сем» драмым модыныт ыле. Калык тунамат, тиде ганат пеш шуко погынен да спектакльым пеш шокшын вашлийын. Тений тиде усталык вашлиймаш Морко районын 100 ияш лӱмгечыжлан пӧлеклалтын. Мо оҥайже, классикыш савырныше марий пьесе-влак почеш шындыме шуко спектакльым нимогай нелылык деч посна уремыште модаш лиеш. Артист-влак «Марий кундем» калык семӱзгар оркестрын шоктымыж почеш муреныт.
