22 октябрьыште М.Шкетан лӱмеш Марий драме театрын сценышкыже тенийсе тургымышто тыгай лӱман кокымшо у паша лекте. Тудым В.Красногоровын «Три красавицы» пьесыж почеш шындыме.
Лач арня ончыч ты комедийым Моркысо тӱвыра полатыште модын ончыктымо ыле. Теве ынде рӱдолаште илыше-влак тудым аклен кертыч. Калык кок вережат пеш шокшын вашлийын.
Тидлан ӧршаш уке, вет сценыште моткоч палыме да шукылан лишыл сӱрет ончыкталтеш. Пенсий ийготыш шушо кум йолташ ӱдыр ик кечын тыгай иктешлымашке толыт: нуно але пӧръеҥ-влакым пиаланым ыштен кертыт ыле. Мутат уке, эн ончычак, нуно шкешт пиалан лийнешт. Вет тӱрло амал дене тиде жаплан кумытынат шкет кодыныт. Героине-влакын пӱрымашышт гоч эше ик гана рашемеш: пиалан лийме шотышто ямде рецепт уке. Кажне айдеме шке илышыжым шке виктара, пиал нерген умылымашат – кажныжын шкенжын. «Ӱдыр таҥлан сай пелаш» спектакльысе героине-влакынат. Тидым актрисе-влак Маргарита Медикова, Антонина Антонова, Светлана Филиппова моткоч оҥайын да умылаш лийшын почын пуат. А могай пӧръеҥым пиаланым ыштен кертыт ыле? Нуным Андрей Бусыгинын «геройжо-влак» гоч ужаш йӧн уло.
Тиде комедий йылме могырым пеш поян. Посна ойсавыртыш-влакым, векат, еҥ-влак тыглай мутланымаште кучылташ тӱҥалыт. Пьесым Светлана Белкова марлаҥден. Режиссер – Роман Алексеев, художник – Сергей Таныгин. Спектакль куштымашлан поян, нуным Татьяна Алексеева шынден.
