У тургымым – у спектакль дене

пресс-конференций-шкетан

М.Шкетан лӱмеш Марий драме театр 6 октябрьыште 104-ше тургымым «Гамлет. Машина. Цемент» у спекталь дене почеш. Тиде йодышлан пӧлеклалтын ыле 27 сентябрьыште  республикысе СМИ-влаклан  эртарыме пресс-конференций.

Театрын художественный вуйлатышыже В.Пектеев ден тӱҥ режиссер Р.Алексеев гастроль да лишыл жапыште ыштышаш паша нерген ойленыт.

Палемдыме, театр пытартыш тылзе утларак жапыште экспериментальный сценыште «Посадить дерево» (реж. В.Домрачев) спектакльын премьержым модын, Российысе национальный театр-влакын «Федерация» фестивальышкышт (Грозный ола), Пошкырт кундемыш Кугу гастроль дене миен толын шуктен. У ий марте ончышылан вич у спектакльым темла — тиде «Гамлет. Машина.Цемент» (С.Пектеев) трагедий, «Китай кува» (Р.Алексеев), «Шӱдыран тат» (А.Ямаев) комедий-влак, «Йӧратымашын акше» (В.Пектеев) да  «Волшебная лампа Аладдина» (С.Строганова)   музыкальный, чапле костюман спектакль.

«Гамлет. Машина. Цемент»  «Шкетан Young» проект кышкарыште ыштыме кумшо паша (тылеч ончыч «Йыван Кырла. Путевка в жизнь», «FOLKS» лийыныт) нерген режиссер С.Пектеев да тудын командыштыже ыштыше композитор Е.Роднянский, хореограф М.Качалкова радамлын каласкаленыт. С.Пектеев у постановкым кызытсе экспериментальный спектакль манын акла. Театрын тӱҥ сомылжо – тачысе кечылан келшыше йодышлан вашмутым кычалаш, манеш  тудо. Сюжетым, герой-влакым Шекспирынымак коден, режиссер действийым Марий кундемыш кусарен. Тидын годымак спектакльыште  У.Шекспирын  моло произведенийлаже , тыгак Ф.Гладковын «Цемент» романже гыч ужашым  муаш лиеш.

Молгунамсе семынак, С.Пектеевын у пашажым  марий ден руш ончышо ик семынак умылен кертыт. Герой-влак кок йылме дене кутырат, тыгак титр рушлат, марлат кая…

 

Весымат каласыман, У.Шекспирын «Гамлет» пьесыжым ынде марла лудаш лиеш. Трагедийым Василий Пектеев ден Анатолий Мокеев кусареныт. Лишыл кечылаште тудо посна книга семын савыкталт лектеш.

Поделиться ссылкой:

© Шкетан театр - 2022

Top