У художественный вуйлатыше ыштышаш паша нерген

М.Шкетан лӱмеш Марий драме театрыште 1 апрель гыч художественный вуйлатышылан Василий Пектеев ышташ тӱҥалын. Тудо театрыште творчество дене кылдалтше пӱтынь пашам, тидын шотыштак режиссер-влакыным, виктараш тӱҥалеш.
Лишыл жапыште ыштышаш паша шотышто Василий Александрович кӱчыкыракын теве кузерак ойла:
— Ыштышаш паша план кугу. 6 октябрьыште Сергей Чавайнын шочмыжлан 130 ий, 29 октябрьыште Яков Павлович Майоров-Шкетанын шочмыжлан 120 ий темеш. Шкетанын лӱмгечыжлан театр ямде манаш лиеш: тенийсе сезон тӱҥалтыште Роман Алексеев «Эреҥер» спектакльым сценыш лукто. Чавайнын юбилейжылан «Элнет» роман почеш постановкым ямдылена. Инсценировко ышталтын, художник дене паша кая. Отпуск деч вара вигак артист-влак дене пашалан пижына.
Июнь тӱҥалтыште Александр Островскийын «Снегурочка» пьесыж почеш тачысе кечылан келшыше марий спектакльым ыштен шуктена.
Кызыт тыгак «Югорно» эпослан инсценировко ышталтеш. Тудымат 2018 ийыште луктын шуктыман.
Ончыко ончалаш гын, шушаш ийыште Константин Коршуновын шочмыжлан 90, Йыван Кырлялан – 110, Юрий Байгузан шочмыжлан 60 ий темеш. Драматург-влакын лӱмгечыштым нунын возымо пьесышт почеш шындыме спектакль дене вашлияш кӱлешлан шотлена. 2019 ийыште Марий театрлан 100 ий темеш гын, 1920 ийыште Марий автономийым ыштымылан ик курым лиеш. Республикын юбилейже вашеш репертуарнам пойдарен, ме Москвашке гастроль дене кайышаш улына. Тидлан кум-ныл спектакльым ямдылен шуктыман.
Эртыше кок ийыште пашам иктешлыше семын ончаш кӱлеш финн-угор театр-влакын «Майатул» фестивальыштым. Ноябрь кыдалне адакат Йошкар-Олаште Российысе куд регион да чек вес велысе финн-угор республикла (Финляндий, Эстоний, Венгрий) гыч театр-влак национальный драматургий почеш комедийым модаш тӱҥалыт.
План чынжымак кугу, вийна уло. Кок ий утла ончыч Москва гыч самырык артист-влак тунемын тольыч. Моткочак чолга ӱдыр-рвезе-влак улыт. Ончычсо труппынат финн-угор тӱнясе театр-влак коклаште эн виянлан шотлалтын. Мемнан вес виян могырна — марий йылме дене спектакльым шындыше ныл профессиональный режиссерна уло.
Василий Александрович латкуд ий жап шочмо театржын пашажым ӧрдыж гыч веле эскерен кертын гын, ынде марий калыкын профессиональный искусствыжым вияҥдыме сомылыш чон йӱлен, кугу кумылын ушнен.