4 мартыште М.Шкетан лӱмеш Марий драме театр шке ончышыжым эше ик у паша дене куандарыш. Тиде Влада Ольховскаян «Хутор, престиж и котик» пьесыж почеш шындыме «Мӱндыр ялыш толын каче» спектакль. Тудым сценыш режиссер Василий Домрачев луктын.
Пьесыште тарватыме теме мемнан ончышылан лишыл. Школым пытарен, кугу олаш тунемаш кайыше ӱдыр у йолташыже-влакым шочмо кундемышкыже унала конда. Нунышт тора ялыште илыше-влакым уда могырым сниматлен, документальный фильмым фестивальыште ончыктен чапланынешт. Но тыштыже йӧршеш вес сӱрет озалана. Ялыште пӱртӱсшат моткоч сылне, тушто илыше-влак шке илемыштымат сайын тӱзатеныт, осал койыш денат таҥым огыт кучо. Лилилан полшаш манын, тӱҥалтышье ача-аваже, коваже, изаже, кресачаже мо йодмым артист семын модын ончыктат. Но… мучашлан ӱдыр да тудын йӧратыме качыже Эдгар-Эдик ошым шемемдаш, сайым осалыш савырен ончыкташ шонымашышт деч шӧрлат… Ончышын кумылжым мотор декораций, сылне сем вӱчка, артист-влак ӱшандарен модыт. Залысе калык тидым совым кырымыж дене шижтарен.
