Теве адакат ик ий шеҥгелан кодо. Тудо тыландат, мыланнат куштылго огыл ыле. Но пандемий мемнам ойырен ыш керт, мӧҥгешла, тудо утларак чолга лияш, пашам ыштыме, ончышо ден театр коклаште кылым кучымо у йӧн-влакым кычалаш таратыш. Мутлан, режиссерна-шамыч онлайн йӧн дене репетицийым эртараш тунемыч, тидлан кӧра тургым мучко 8 у спектакльым сценыш луктын кертна. Театрын историйыштыже икымше гана интернет гоч вияш эфирыште уло тӱнялан спектакльым ончыктышна. Тиде спектакльже «Салика» ыле, да тудо сценыш театрын шочмо кечынже 900-шӧ гана лекте.
Сай тӱҥалтышым умбакыже шуена. Тыге, 3 январьыште «Сӧсна поминка» (Г.Гордеев) комедий ден 5 январьыште «У ий касын томаша: Настачий але Марпа ?..» концертым уэш вияш эфирыште ончаш лиеш. Тидлан сайтыште билетым налаш гына ида мондо. Моско жап дене 16.00 шагатлан тӱҥалеш.
Театр шке ончышыжо-влакым шушаш У ий дене концерт программе полшымо дене 26 да 27 декабрьыште порын саламлыш. Сылне муро да куштымаш деч посна залыште шинчыше-влакын чоныштым лотерей дене модын налме пӧлекат куандарыш. Эртыше ий мемнан деке полшаш кумылан тошто йолташна-влакым пӧртылтыш, у компаний-влакым пӧлеклыш. Таум ыштен, ме спонсорна-влаклан пашаштышт у деч у ошкылым, тӱвыргӧ паша лектышым, у сеҥымашым, тазалыкым, пиалым тыланена. Ончыкыжат пырля лийына манын моткочак ӱшанена. Теве нунын лӱмышт:
Ильин Алексей Мансурович, «Фарб-М» охранный предприятий;
Давлетшин Рашид Хабибрахманович, «Броксталь» ООО;
Воронцов Вячеслав Петрович, «Мари» ресторан;
Воронцов Сергей Петрович, «Плес» фирме;
Пуртов Виталий Дмитриевич, «Пектубаевские полуфабрикаты»;
Герасимова Ирина Евгеньевна, «Электрон» кевыт;
ИП Подаваева Любовь Михайловна.
