Тӱвыра пӧртлан Виктор Бурлаковын лӱмжым пуымо.

22 сентябрьыште марий театр искусствышто моткоч келге да чапле кышам кодышо еҥ, уло ӱмыржым сценылан пуышо,  РСФСР-ын да МАССР-ын калык артистше Виктор Бурлаковын шочмыжлан 95 ий темын. Тиде кечын лӱмлӧ артистын шочмо кундемыштыже, Кужмарий селасе культур пӧртыштӧ кугу пайрем мероприятий эртен. Тушко М.Шкетан лӱмеш Марий драме театрат ушнен. Тыгак пелашыже Валентина Васильевна, Татьяна ӱдыржӧ да уныкаже-влак толыныт.

Каласыман, В.Бурлаков шочмо кундемже дене моткоч пеҥгыде кылым кучен. Верысе художественный самодеятельностьлан тӱрло семын полшен. Тудын мурыжо-влак, тудын мыскараже негызеш шындыме сценке-влак тачат репертуарыште илат. Тидым сцене гыч ты пайрем кастенат ончыктышт. Посна еҥ-влакын шарналтен ойлымыштым колышташ пеш оҥай ыле. Тидын шотыштак театрын художественный вуйлатышыже В.А.Пектеевынат. Василий Александровичын каласкалымыжым артист-влак муро куштымаш дене шуеныт. А Маргарита Медикова В.Бурлаковын мыскараже негызеш ямдылыме «Марий кас» да «Ялысе кӱтӱчӧ» сценке-влакым модын ончыктен.

Кугу талантан землякышт дене кугешнен, тудын лӱмжӧ, ыштыме пашаже ончыкыжат илыже манын, ял шотан администраций  район погынымашке йодмаш дене лектын. Тидлан мелын лийын, тушто тыгай пунчалым лукмо: Кужмарий селасе тӱвыра пӧртлан РСФСР-ын да МАССР-ын калык артистше Виктор Бурлаковын лӱмжым пуаш. Тидын нерген пайрем касыште муниципальный районым вуйлатыше С.Халтурин увертарен.

Поделиться ссылкой:

© Шкетан театр - 2022

Top