М.Шкетан лӱмеш Марий драме театр 104-ше тургымжым 27 апрельыште уэмдыме «Юмынӱдыр» мюзикл дене мучашлыш. Шым ий гыч сценыш уэш пӧртылтымӧ ты спектакльым калык моткоч сайын вашлийын. Тӱжвал могырым ончымаштат, семын йоҥгалтмыже шотыштат тудо чынжымак у тӱсым налын. Вет проекцийым ямдылымаште тачысе технологийын сеҥымашыжлан эҥертыме, музыкланат у аранжировкым ыштыме. Тӱҥ рольым самырык артист-влак Марина Воронцова ден Иван Соловьев модыт.
Тургымым петрымаш кажне гана пайрем семын эрта. Теният тыгак лие. Вет ты жапыште кугу паша ышталтын. Коллектив Россий да республик кӱкшытан фестивальлаште шке мастарлыкшым ончыктен; Башкортостан кундемыш Кугу гастрольыш миен; сценыш индеш у спектакльым луктын; Российысе национальный театр-влак ассоциацийын проектлашкыже ушнен. А тиде – кажне кечын да коллективысе кажне еҥын тыршен ыштыме пашаже. Ойыртемалтше-влак ты кастене тӱрлӧ кӱкшытан награде дене палемдалтыныт.
Марий Эл Правительстве вуйлатышын икымше алмаштышыже М.Васютин сцене гыч ятыр поро мутым ойлен да театрын актержо Алексей Тетеринлан Марий Эл Правительствын Чап кагазшым кучыктен. Тыгак икмыняр еҥым Марий Элын культур, печать да калык-влакын пашашт шотышто министерствын Чап грамотшо да министрын Тауштымашыже дене палемденыт.
Театр администраций сеҥымашке шушо посна пашаеҥ-влаклан тыгак Чап кагазым да окса премийым кучыктен.
Ты кастене, ончылгоч увертарыме семынак, Юрий Русанов лӱмеш премийын у лауреатше-влакын лӱмышт пале лийын. Тудым «Марий Эл Радио» радиоканалын тӱҥ редактор Володя Матвеев (журналистике), Шкетан лӱмеш театрын актрисыже Светлана Строганова (театр искусство алан) суленыт.
Театр тургымым петырымаште Марий Эл деч Федераций Советыште представитель, Федераций Совет председательын алмаштышыже Константин Косачев лийын. «Юмынӱдыр» мюзиклым марий калыкын кӱкшӧ культур произведенийже семын аклен.
Тургым петыралтын. Но паша умбакыже шуйна. Могайжым рекламе гоч пален налыда.