Тургымым иктешлымаш да Юрий Русанов лӱмеш премий

28 апрельыште кугу концерт программе дене М.Шкетан лӱмеш Марий драме театр шкенжын черетан 102-шо тургымжым мучашлыш.

Тиде гана тургым ойыртемалтше лийын. Короновирус чер шарлымым сорлыклышашлан театр февраль тылзе марте залыш калыкым 50 процентшым гына поген кертын. Но тиде усталык пашам чарен шогалтен огыл. Эртыше тургымышто сценыш 10 у спектакльым лукмо.  Тиде кастене артист-влак тушеч ужаш-влакым модын ончыктышт. Тыгак мурызо-влак ятыр муро дене куандарышт, премьерат икмыняр ыле.

Культур, печать да калык-влакын пашашт шотышто министрын алмаштышыже М.Матвеев поснак тыршен ыштыше еҥ-влаклан Марий Эл Правительствын Благодарностьшым, министерствын Почетан грамотшо-влакым кучыктыш. Марий Эл Кугыжаныш Погын Председательын алмаштышыже Е.Кузьмин тыгак сцене гоч Чап кагаз дене икмыняр артистым суапландарыш.

Администраций  ты гана мондалташ тӱҥалше йӱлам пӧртылтыш. Театрын поро йолташыже-влакын полшымышт дене поснак сайын пашам ыштыше-влаклан Тауштымашан серышым да пӧлек-влакым кучыктыш. Тыгак спонсор-влак посна еҥлан шке пӧлекыштым ыштеныт.

А эн ушеш кодшыжо тиде кастене теве мо ыле. Журналист, поэт, чолга мер пашаеҥ да Шкетан театрын ончычсо директоржо Юрий Петрович Русановын йолташыже-влак  тудын лӱмеш премийым ыштеныт. Тудым Марий театрым йӧратыше, тушто уло вий-куатым, моштымашым пыштен тыршыше, марий йылмым, тӱвырам арален кодымашке да вияҥдымашке шке надыржым пыштыше еҥлан пуаш палемдыме. Тыге, амалкалче Вячеслав Петрович Воронцов икымше номеран дипломым театрын тӱҥ режиссёржо, Марий Элын калык артистше Роман Алексеевлан кучыктыш.  Роман Юрьевич  тыгай премийым  чынжымак сай пашаж дене сулен.

Тургымым иктешлыме. Но паша умбакыже шуйна.

 

Поделиться ссылкой:

© Шкетан театр - 2020

Top