М.Шкетан лӱмеш Марий драме театрын актрисыже, Марий Элын калык артистше Антонина Антонова Национальный театр-влакын Вера Кузьмина лӱмеш I тӱнямбал фестивальыштын лауреатше лийын. А.Богачеван «Китайская бабушка» пьесыж почеш шындыме да фестивальыште ончыктымо «Китай кува» спектакльыште тудын модмо Катерина Денисоважым жюри член-влак «кокымшо планан эн сай ӱдырамаш» роль номинацийыште сеҥыше семын палемденыт.
Тиде фестиваль 17-22 ноябрьыште Чувашийыште эртен. Тудым лӱмлӧ чуваш артист, СССР-ын калык артистше Вера Кузьминан 100 ияш лӱмгечыж лӱмеш тений икымше гана эртареныт. Оза-влак деч посна Российысе Башкортостан, Татарстан, Марий Эл, Калмыкий, Крым) да лишыл вес элысе (Азербайджан) национальный йылме дене модшо театр-влак шке мастарлыкыштым ончыктеныт.
Антонина Антоновам кугу сеҥымаш дене шокшын саламлена! Каласаш кӱлеш, тиде пьесым сценыш лукташ Антонина Алексеевна йолташыж-влак дене пырля темленыт. Катерина Денисовна — нылле наре ий жапыште модмо шуко чапле рольжо гыч иктыже.
