Тиде ойсавыртыш – Марий Элын калык писательже, Марий комсомолын Олык Ипай лӱмеш, Марий Эл кугыжаныш, Яныш Ялкайн лӱмеш премий-влакын лауреатше, поэт, прозаик, драматург, публицист Вячеслав Абукаев-Эмгак нерген. 27 январьыште М.Шкетан лӱмеш Марий театрыште Вячеслав Александровичым шарныме кас-концерт эртен. Тудо 65 ияш лӱмгечыжлан пӧлеклалтын.
Программе тӱҥ шотышто В.Абукаевын сылнымут корнылаже, тудын мутшылан возымо муро, пьесыж почеш шындыме спектакль ужашла гыч шоген. Тыгак В.Абукаев-Эмгак лӱмеш «Ший памаш» усталык конкурсын лауреатше-влак сценыш лектыныт.
Тиде кастене В.Абукаев-Эмгак лӱмеш фондын (фондым писатель да драматург Василий Краснов чумырен да виктарен шога) попечитель советшын еҥже Э.Иманаев у медальым учредитлыме нерген увертарен. Тудым Марий Элысе культурым да искусствым вияҥдымашке кугу надырым пыштыше еҥ-влаклан кучыкташ палемдыме.
Икымше медальым В.Абукаевын ты касыш лӱмын толшо землякше-влак Башкортостан Республик Мишкан районысо муниципальный советым вуйлатыше Вячеслав Сабировлан, ты районысо тӱвыра пӧлкам, «Эрвел марий» калыкле-тӱвыра автономийым вуйлатыше Радион Плотниковлан да Башкортостан кугыжаныш университетын Бирск оласе филиалыштыже марий йылмым да сылнымутым туныктышо Алена Илиевалан кучыктымо. Нуно пеленышт эше индеш еҥлан тыгай медальым наҥгаеныт.
Тыгак Марий Элыште илыше да пашам ыштыше икмыняр еҥлан медальым кучыктымо. Нунын коклаште писатель да режиссер, мурызо да моло тӱрлӧ специальностян еҥ-влак лийыныт. Каласыман, чылаже 50 наре тыгай медальым левыктыме, тудым ончыкыжо тӱрлӧ моло вес мероприятийлаште кучыктат.
Кас мучко юбилярын илыш-корныжо, усталыкше нерген ойлымо. Тудын мутшылан возымо муро-влакым Иван Смирнов ден Зоя Берникова, Светлана Осипова ден Антонина Антонова, моло сылне йӱкан мурызо-влак йоҥгалтареныт.
Вячеслав Абукаев-Эмгакын ӱмыржым тудын произведенийже-влак шуят. А тудо кӱчык ӱмырыштыжӧ моткоч кугу сылнымут поянлыкым поген.
