Тошто пӧртын монологшо

Тошто пӧртын монологшо 2023-01-30

30 январьыште Актер-влакын пӧртыштышт оҥай кас эртыш. Лӱмлӧ марий писатель Маргарита Ушакован «Тошто пӧртын монологшо» ойлымашыжым М.Шкетан лӱмеш Марий драме театрын артистше-влак калык ончылно йӱкын лудыныт.

Тиде – Марий Элын калык артистше Светлана Строганован шке кумылын шуктымо пашаже. Келге содержаниян тиде ойлымашым роль дене келыштарен йӱкаҥденыт. Шоҥго да тошто пӧртын «шижмашыжым» Россий Федерацийын сулло артистше Олег Кузьминых, сурт озан поро да пашаче кумылжым артист Генрих Тимиряев, оза ватын утыжымат осал улмыжым Марий Элын сулло артистше Марина Почтенева залыште шинчыше-влак деке намиен шуктеныт. Светлана Строганова шкеже тиде суртышто кушшо ӱдыр, Г. Тимиряев рвезе-влакым «модыныт». Артист-влак кажныжым моткоч мастарын чонаҥденыт, шинчаончыко конденыт.
Калык моткоч шокшын вашлийын. Касыште автор М.Ушакова шкежат лийын.

Поделиться ссылкой:

Top