Тыгай лӱман концерт программе дене палемдыш шкенжын шочмо кечыжым М.Шкетан лӱмеш Марий драме театрын самырык актержо Иван Соловьев.
Иван М.Щепкин лӱмеш кӱшыл театр училищым тунемын пытарыме деч вара труппышко ушнен. Таче роль шотышто ик эн поян артист. Тудым кажне гаяк режиссер шке спектакльышкыже налаш тырша. Шукыж годым тӱҥ рольым модеш. Торъял район Немда кундемын эргыжлан артист лияш пӱралтынак шочын манынат каласаш лиеш. Тудлан пӱртӱс кугу кап-кылым, чапле йӱкым пуэн. Да пашам йӧратыме кумылым. Иван мастарлыкшым эре шуарен шога, тунемеш.
Иван Соловьев кок усталык корно дене кая. Кокымшыжо – мурызо. Паша деч кӱрылтде, икмыняр ий ончыч В.Ульянов лӱмеш Чебоксар кугыжаныш университетысе искусство факультетыште академический мурымаш отделенийыште тунемын. Таче тудо эстраде аланыштат сайын палыме мурызо. Тудын тыршымыж дене театрыште «Уста» ВИА чумыралтын. Тыгак «Квинто» группышто мура. Да лач мурызо семын палемдыш 30 ияш шочмо кечыжым кодшо шуматкечын театр сценыште.
Цех-зал, мутат уке, ончаш толаш чыла кумылан еҥым шыҥдарен ыш керт. Но кӧ билетым ончылгоч налын шуктен, тугайже шкенжым чынжымак пиаланлан шотлен. Ваня ончышылан моткоч поян программым ямдылен ыле. Касым шкежак вӱден, залыште шинчыше-влак дене шинчаваш ончен кутырен. А нунын коклаште шукынжо лишыл родо-тукымжо да йолташыже, шочмо Немда кундемже гыч толшо пошкудыжо-влак шинченыт. Эн пиаланже, мутат уке, аваже – Лидия Петровна – лийын. Шкеже шуко мурен. Тыгак училищыште пырля тунемше йолташыже-влак, «Уста» ВИА концертым сӧрастараш полшеныт.
Иван Соловьев ончышыжлан моткоч сылне, чоным куандарыше, кумылым вӱчкышо касым пӧлеклен. Вашешыже шкежат саламлыше-влак коклаш вӱдылалтын, ончышыжын шокшыжым шижын куанен.
Ончыкыжат усталык корнет пойдаралтын толжо, самырык артист, каласыме шуэш тудлан.
