Тиде мастарлык маналтеш

Иван Смирнов. Тиде артистлан таче рекламе ок кӱл. Тудын лӱмжак «тугеже спектакльым ончашак кӱлеш» манмым ончыкта. А мурызын концертше нерген гын ойлыманат огыл – кажне гана залыш калыкым тич погына. Эртыше шуматкечынат тыгак лие.
Мутат уке, лӱмым ыштышашлан шуко пӱжвӱдым йоктараш кӱлын. Иван Викентьевич айдемыжак тугай, чылажымат сайын ышташ тунемын. Спектакльыште образым чоҥа гын, геройжын чонжым «пундаш» марте пургедеш, мура ш лектеш гын, чынжымак мура, фонограмме дене калыкым ондалаш ок тырше. Пӱртӱсын пуымо йӱкшӧ озажым ок ондале. Да тудо вокал дене педагогшо-влакланат кажне гана таум ышта.
Тенийсе концертшым Иван Викентьевич кугу сценыш икымше гана лекмыжлан 35 ий теммылан пӧлеклен. Тунам, эше ГИТИС-ыште тунеммышт годым, марий студийын студентше-влак кеҥеж каникуллан Йошкар-Олаш толыныт. Ончыклык драме артист-влакым тунам концерт программе дене республикысе районла мучко гастроль дене колтеныт. Тиде корно таче кече мартеат шуйна. Теве кодшо идалык мучаште Иван Смирнов йолташыже-влак дене пырля икмыняр районышто концертым эртарышт. А январь мучаште театрыште кугу концертым ончыктымаш ынде поро йӱлаш савырнен.
Иван Смирновын репертуарже моткоч кумда. Тушто тӱҥ шотышто профессиональный композитор-влакын мурышт улыт. Шуко мура Вениамин Захаровын, Сергей Маковын, Валерий Кульшетовын возымыштым. Шке землякше Эрик Сапаевынымат… Вес калык-влакын мурыштымат кычалеш. Тыге, мутлан, 27 январьыште грузин, украин, эсогыл итальян муро-влакым йоҥгалтарыш. Да келшыше почеламутлан шкеат семым пышташ кумылан.
Иван Смирнов пытартыш жапыште артист коллегыже-влак дене дуэт дене мура. Мутлан, Светлана Строганова дене «Лум лумеш», Марина Воронцова дене «Ныжыл йӱр» мурым мурымышт годым чапле йӱкан улмым веле огыл, драматический актер мастарлыкымат ончыктышт. Концерт программым тыгак Иван Соловьев, Дмитрий Воронцов, Маргарита Медикова, Алексей Сандаков, Генрих Тимиряев, Михаил Александров да артист-влак весела да чолга куштымаш-влак дене сӧрастареныт.