М.Шкетан лӱмеш Марий драме театр Кугу сеҥымашлан 80 ий теммылан пӧлеклалтше кок спектакльым почела сценыш лукто. 6 майыште театрыште эше ик мероприятий эртаралте. Кугу Отечественный сарыште кредалше да театрыште пашам ыштыше-влаклан пӧлеклалтше Мемориал оҥам почмо.
Тушко чылаже 27 еҥын лӱмнерже пурталтын. Нуно тӱрлӧ должностьышто пашам ыштеныт. Улыт режиссер-влак (Бабенко И.С., Леготин Н.И., Лузгинов Н.В., Федоров С.П.), артист да директор Бирюков Я.А., артист да литератур ужашым вуйлатыше Волков А.А., артист-влак Байков П.Н, Григорьев Т.Г., Лебедев Ф.О… Семенов Н.А. волгалтарыше, Шабердин Ф.П. бутафор цехым вуйлатеныт… Иктышт сар тӱҥалме икымше кечылаштак мобилизоватлалтыныт, весышт — варарак. Икмыняр еҥын ӱмыржӧ сӧй пасуэш кӱрылтын. Весышт сусырген але сеҥымаш марте кредалме деч вара уэш театрыш пӧртылыныт. Мутлан, РСФСР-ын калык артистше Степан Кузьминыхын сар корныжо поснак оргажан лийын. Тудо кужу жап пленыште лийын, сар пытыме деч кок тылзе ончыч гына утареныт. Сар деч вара театрын вӱдышӧ артистше пеш шуко чапле рольым чоҥен.
Мемориал оҥам ямдылымаште театрын музейжым вуйлатыше, Марий Элын сулло артистше Е.Г.Мочалован надырже пеш кугу. Тудо сарыште лийше-влак нерген уверым кужу жап тӱрлӧ вере кычалын, муын да иктеш чумырен. Кажныж нерген (кум еҥын веле рашлык уке) моткоч радамлын каласкален кертеш. Оҥам почмо годым поснак ойыртемалтше еҥ-влак нерген оҥайын ойлен.
Марий Элын калык артистше Строганова С.В. ден Марий Элын сулло артистше Почтенева М.Г. рушла рекрут калык муро-влакым йоҥгалтареныт. Тиде мурым нунылан лӱмло музыкант Александр Иванов пуэн да шарнымаш оҥам почмо годым шкеак гармонь дене шоктен.
Элым аралыше-влак кеч-могай жапыштат эн пагалыме еҥ лийыныт да улыт. Театрыште ыштыше да сарыште кредалше-влаклан Шарнымаш оҥам почо дене ме нунын лӱмыштым да патырлыкыштым ӱмырешлан суапландаренна. Тиде тыгак лийшаш, тиде мемнан нунын ончылно порысна.