29 августышто Санян Вачин пьесыж почеш шындыме «Колумб» драме дене М.Шкетан лӱмеш Марий кугыжаныш драме театр шкенжын черетан 107-ше тургымжым почо.
У тургым почмо дене саламлышыла, Марий Эл Правительстве вуйлатышын алмаштышыже – тӱвыра, печать да калык-влакын пашашт шотышто министр К.А.Иванов палемдыш: «Шкетан лӱмеш Марий – таче илыш дене тӧр ошкылшо, эреак у проект-влакым илышыш шыҥдарыше театр. Тудо таче Казаньысе, Санкт-Петербургысо гай кугу кугу олаласе сценыште шкенжын мастарлыкшым ончыкта». 107-ше тургым тек эшеат тувыргӧ саскан лийже манын тыланен, икмыняр еҥлан Правительствын Таумутшо ден Чап таныкшым кучыктыш.
Тургымым молан тынар ондак почмо – йодын кертеш южо. Тидлан вашмут тыгай: ончылно пеш шуко паша вуча, чылажымат ыштен шукташ манын, вашкыде ок лий. Сентябрь кыдалне «Ваня чӱчу» спектакль Санкт-Петербургыш кая, тудым XVI «Александринский» тӱнямбал театр фестиваль кышкарыште Александринский театрын сценыштыже модаш тӱҥалыт. Тушеч пӧртылмеке, корно Пошкырт марий-влак деке шуйналтеш.
Тидын годымак режиссер-влак шуко у спектакльым сценыш лукташ ямдылат. Тидын нерген СМИ-влаклан пресс-конференций годым радамлын каласкалыме ыле.
Ончышо-влаклан шижтарена: эскерыза, шымлен ончыза мемнан репертуарнам – тушто мо лийшаш чылажат ончыкталтеш.
У тургым почылтмо дене пӱтынь театр коллективым да ончышына-влакым уло кумылын саламлена.
