12 декабрьыште М.Шкетан лӱмеш театрыште кугу пайрем ыле. 1998 ийыште М.Щепкин лӱмеш кӱшыл театр училищым тунемын пытарыше студий 25 ияш лӱмгечыжым сценыште пайремлен.
Тиддеч ончыч, ноябрь мучаште, нунылан Москваште эртыше фестивальыш каяш пиал логалын ыле. Тунам, мутат уке, тунемме училищышкышт миен кошташ жапым муыныт, педагогышт дене вашлийыныт.
«Театр – илыш, илышна – театр» пайрем каслан пеш тыршен ямдылалтыныт. Фойеште нунын модмо спектакльла гыч фотовыставке пашам ыштен. Тыгак пашашт да илышышт дене кылдалтше фотоштым калыклан ончаш оҥай формо дене луктыныт.
А пайрем видеосюжет-влакым ончымо дене тӱҥалын. Тушто нине ӱдыр-рвезе-влакын Москвашке тунемаш мийымышт да тунемын пытарен, училище да педагог-влак дене чеверласыме тат-влак сӱретлалтыныт.
Пайрем кас тӱҥалтыште сценыш сценыш Марий Эл Правительстве вуйлатышын икымше алмаштышыже М.Васютин лектын. Тудо актер-влакым чапле лӱмгече дене саламлен. Вара актрисе Галина Ивановалан «Марий Элын сулло артистше» лӱмым пуымо нерген увертарен, удостоверенийым да оҥеш пыжыктыме знакым кучыктен. Тыгак актер Алексей Сандаков Марий Эл Правительствын Чап грамотшо дене палемдалтын.
Каласаш кӱлеш, тиде касыш ты студийым училищыште туныктышышт Н.А.Макарова толын ыле. Тудо тунемшыже-влакын сеҥымашыштлан куанымыжыжым луктын ойлен. Наталья Алексеевналан Марий Эл тӱвыра, печать да калык-влакын пашашт шотышто министерствын Чап таныкшым министрын икымше алмаштышыже М.Матвеевен
Тыгак юбиляр-влакым видеозапись гоч алтай студий гыч ик жапыште тунемше, кызыт режиссер семын спектакльым шындыше да киноартист Амаду Мамадаков, Удмурт национальный театрын коллективше саламленыт.
Чылт шке студийышт (латкум еҥ) дене кок ужаш гыч шогышо программым ямдыленыт. Икымшыштыже спектакльла гыч ужаш-влакм модын ончыктеныт. Кокымшыжо муро-куштымашлан пӧлеклалтын ыле. Тыште кажныже шке усталыкшым почын ончыктен. Коллегыштым пашам пырля ыштыше йолташышт, кажныже шке студийышт дене, оҥайын саламлышт.
Ты студийысе артист-влак кажныже чолга, тыгак икоян улмышт, ваш эҥертен пашам ыштымышт дене ойылртемалтыт. Пайрем касым эртарымышт гочат тиде сайын шижалте. Тудо чынжымак моткоч поян да оҥайын чоҥымо ыле.
