27 март – Тӱнямбал театр кече. Тидым ий еда республикысе куд театр пашаеҥ-влак тӱшкан палемдат. А тылеч ончыч «Театральный Йошкар-Ола» фестиваль эртаралтеш. Тушко кажне театр эртыше идалыкыште сценыш лукмо у пашажым критик-влаклан аклаш темла. Тений вич еҥан жюри пашам ыштен. Тудым Моско критик, «Сцена» журналын тӱҥ редакторжо, искусствовед, профессор, «Шӧртньӧ маске» Национальный театр премийын жюри да эксперт совет еҥже Дмитрий Родионов вуйлатен.
М.Шкетан лӱмеш Марий драме театр фестивальыш А. Чеховын пьесыж почеш режиссер С.Пектеевын шындыме «Ваня чӱчӱ» ден «Небесный тихоход» кинофильм негызеш (А.Яковлевын сценарийже) Р.Алексеевын шындыме «Кавасе алаша» спектакль-влакым луктын. Кок паша икте-весе деч чот ойыртемалтыт — драме да комедий, экспериментальный да классический йӧн дене шындыме … Нуным ончышат, критик-влакат тӱрлын аклат да акленыт. Тиде тыгак лийшаш. А иктешлымашыже Театр кечын сценыште ышталтын. Лектыш тыгай.
«Ваня чӱчӱ» спектакльын режиссержо С.Пектеев ден Елена Андреевнан рольжым модшо С.Скулкина жюрин посна премийже дене палемдалтыныт. Сонян образшым чоҥышо Н.Алексеева «кокымшо планан эн сай ӱдырамаш роль», С.Данилов «Кавасе алаша» спектакльыште Саша чӱчӱн рольжылан «эпизодысо эн сай роль» номинацийыште Йыван Кырла лӱмеш премийын лауреатше лийыныт.
Тений Гран-прим кок спектакльлан пуэныт. Иктыже – М.Шкетан лӱмеш Марий драме театрын «Кавасе алаша» музыкальный комедийже. Тиде паша Кугу Сеҥымашлан 80 ий теммылан пӧлеклалтын. Спектакльым шындыше, тушто модшо-влакым кугу сеҥымаш дене саламлена.
Театр искусствылан уло илышыжым, моштымашыжым пуымылан театрын актержо И.Смирнов «За честь и достоинство» премий дене палемдалтын.
Мемнан театрын тӱҥ художникше С.Таныгин республикысе вес театр-влак денат кылым куча.
