29 ноябрьыште пӱтынь марий общественность М.Шкетан лӱмеш Марий кугыжаныш драме театрын 100 ияш лӱмгечыжым палемден. Тиде кечын республикысе газет ден журнал-влак театрлан пӧлеклалтше номерым луктыныт. А лӱмгече пайрем касыште залыште правительство вуйлатышын алмаштышыже, министр, депутат, марий калыкын эн уста еҥже (поэт-писатель, композитор, художник, артист) да театрым йӧратыше зритель-влак шинченыт. Нунылан шинчаваш сценын ончыл ужашыштыже артист-влак верланеныт. Тиде кастене молгунамсе семын пашам ыштен огытыл, нуно шкешт нерген сулен налме поро шомакым колыштыныт, саламлымашым налыныт.
Эн ончыч саламлыме шомак дене сценыш Марий Эл Республикым Вуйлатыше А.А.Евстифеев лектын. Тудо Россий Федерацийын президентше В.В.Путинын театрын коллектившым саламлымашан телеграммым лудын пуэн. Элым вуйлатыше театрын у тукымым шуарен куштымаште, калыкын шинчымашыжым да чонжым пойдарымаште, калык культурым да йӱлам арален кодымаште кугу пашам шуктымыж нерген палемден.
А.А.Евстифееев Шкетан театрыште, кызыт республикыште чумыр налмаште культур отрасльыште лийше сай вашталтыш-влак нерген ойлен. Вара театрын директоржылан автобусым налаш сертификатым кучыктен. Эреак республик мучко, вес кундемлаште илыше марий-влак деке гастроль дене коштшо коллективлан тидын деч сай пӧлекше лийынат ок керт.
Республикым вуйлатыше посна еҥ-влакым награда дене палемден. «Марий Эл Республикысе культурын сулло пашаеҥже» чап лӱмым радиоцех вуйлатыше Эдуард Копцевлан пуымо. Марий Эл Республикын Правительствыжын Почетан грамотыж дене артист-влак Павел Ефимов ден Галина Иванова палемдалтыныт. Марий Эл Республикым Вуйлатышын Тауштымашыжым сценын машинистше Эдуард Байгузинлан, труппым вуйлатыше Надежда Бурлаковалан, реквизит цех вуйлатыше Нина Копцевалан, оралтым шотышто кучымо шотышто службо начальник Игорь Павловлан, волгалтарыме цех начальник Алеся Семеновалан, театрын артистше-влак Алексей Сандаковлан, Алексей Тетеринлан да Светлана Филипповалан кучыктен.
Театрын коллектившым Марий Эл Кугыжаныш Погын председатель А.В.Смирнов саламлен, коллективлан, художественный вуйлатыше В.А.Пектеевлан да икмыняр пашаеҥлан Почетан грамотым кучыктен.
Марий Элыште тӱҥ федеральный инспектор П.Н.Журавлев РФ президентын Юл кундем федерал округышто полномочный представительже И.А.Комаровын саламлымашыжым лудын пуэн.
Марий Эл культур, печать да национальность-влакын пашашт шотышто министр К.А.Иванов тиде кастене поснак шуко шокшо шомакым ойлен, тыгак шуко еҥлан министерствын Почетан грамотыжым, министрын Тауштымашыжым кучыктен.
РФ СТД лӱм дене сценыш тудын Секретарьже, республикысе СТД-влак Советым вуйлатыше Б.Н.Манджиев лектын, СТД председатель А.А.Калягинын саламлымашыжым лудын пуэн.
Театрын коллектившым Марий Мер каҥашым вуйлатыше Э.Александров, республикысе театр-влак, Г.Камал лӱмеш Татар, К.Иванов лӱмеш Чуваш, Б.Басангов лӱмеш Калмык театр гыч толшо уна-влак, республикысе культур учреждений, мер организаций, усталык ушем-влак лӱм дене Культур пашаеҥ-влак реском председатель В.П.Ушнурцев, муниципал район-влак лӱм дене Оршанке администраций вуйлатыше А.Л.Плотников, республикысе ял озанлык предприятий-влак лӱм дене Кугыжаныш погынын депутатше, У Торъял районысо «Икымше май» ял озанлык артель вуйлатыше А.А.Новиков саламленыт.
Тиде кечылан театр нерген видеофильмым ыштыме. Программым тыгак Э.Сапаев лӱмеш опер да балет театрын артистше-влак, «Марий Эл» куштышо, «Марий памаш» фольклорно-этнографический ансамбл-влак сӧрастараш полшеныт.
Каласыман, театрым 100 ий дене саламлымашан шуко телеграмма толын. Тиде пайрем касым эртарымашке тӱрлӧ учреждний ден организаций надырыштым пыштеныт. Чылаштлан коллектив кугу таум ышта. Мемнан кылна ончыкыжат пеҥгыде лиеш манын ӱшанена.
Таче, 30 ноябрьыште, артист-влак «100 ийлан – ик гана» лӱм дене кугу пайрем концерт дене ончышо-влакым куандарат.