26 апрельыште, Марий талешке кечын, М.Шкетан лӱмеш Марий драме театрын коллективше молгунамсе семынак эрденак М.Шкетанын памятникше воктене погыныш. Театрын эртыме корныштыжо шкеныштым тале ончылъеҥ семын ончыктышо-влак нерген шарналтымаш ынде сай йӱлашке пурен. Тиде ганат театрын художественный вуйлатышыже Я.П.Майоров Шкетанын суапле сомылжо, А.И.Маюк-Егоровын, С.С.Кириллован режиссер семын театрым кӱшкӧ нӧлталмышт нерген ойыренак палемдыш.
Тиде кечын эше вес суапле сомылым шукталте. Марий Элын калык, РСФСР-ын сулло артистше Иван Якаевлан Шарнымаш оҥам почмо. Тудым артистын илыме пӧрт пырдыжеш (Ленин проспект, 19) сакыме.
Иван Тарасович марий артист-влак кокла гыч МАССР-ын сулло артистше суапле лӱм дене икымше палемдалтын. Тиде 1939 ийыште лийын.
1935 ийыште Марий искусство техникумысо актер отделенийым тунемын пытарыме деч вара И. Якаев 40 ий утла Марий театрыште ыштен. Тудо тӱрлӧ планан рольым модын. Тидым репертуаржым онченат умылаш лиеш. Марий драматургийым гына налаш гын, Мачук («Ачийжат-авийжат») да Епсей («Мӱкш отар»). Тиде примерак драма да комедий шотан образ-влак дене пашам ыштымыжым пеҥгыдемда. «Саликаште» ӱмыржӧ мучко ныл тӱрлӧ рольым ыштен: Полатов (1938), Эчук (1939), Ози Кузи (1942), Сармаев (1956).
И.Якаев руш да совет классике произведений почеш шындыме шуко спектакльыште модын.
Илышыште пеш поро да мыскараче улмыж нерген В.А.Пектеев, Марий Элын сулло артистше Ю.В.Алексеев шарналтен каласкаленыт.
Тылеч вара М.Шкетан лӱмеш театр дене кылдалтше лӱмлӧ еҥ-влакын Шарнымашт оҥаш воктеке миен, кажныж нерген порын шарналтыме да пеледышым пыштыме.