1 июньышто, театрыште сылнымут пӧлкам вуйлатыше Светлана Мартьяновна Белкова 60 ияш лӱмгечыжым палемда.
Светлана Мартьяновна — Марий Эл Республикын сулло журналистше (2000), Россий Федерацийысе культурын сулло пашаеже (2015).
Марий кугыжаныш университетын историй-филологий факультетшым тунемын пытарымеке вигак республикысе рӱдӧ «Марий коммуна» (кызыт «Марий Эл») газет редакцийыш пашаш толын. Да ончыкыжо пашаче корныжо пӱтынек тиде изданий дене кылдалтын. Возышаш еҥын каласкалымыжым колышт, мо ужмо-колмым иктешлен, келгын шонкален моштышо, лывырге марий йылме дене возымышо тиде журналистын лӱмжӧ лудшо коклаште пеш вашке палыме лийын. «Мый пиалан улам, шке верем вигак муынам, ӱмырем мучко йӧратыме пашам ыштенам»,- ойла шкеже. Ответственный секретарьын, тӱҥ редакторын алмаштышыже сомылым шуктымо годымат возаш жапым эреак муын.
Эн йӧратыме темыже – культур да искусство. Да пеш шуко публикацийже М.Шкетан лӱмеш Марий драме театрлан пӧлеклалтын. Тидак ныл ий ончыч Светлана Мартьяновнам рӱдо марий театрыш конден. Кызыт сылнымут пашалан вуйын шога. Кугу надырым Шкетан театрын 100 ияш корныжым радамлен иктешлыше кок томан книгам, «Энциклопедия театров Республики Марий Эл» изданийым ямдылымашке пыштен. Сценыште шындышаш икмыняр пьесым марий йылмыш кусарен.
Тидын годымак журналистикым ӧрдыжко шӱкалын огыл. Тудын возымыжо республикысе тӱрлӧ газет ден журналлаште савыкталтеш
Саламлена Светлана Мартьяновнам шочмо кечыж дене. Тыланена тумо гай пеҥгыде тазалыкым, чевер кече гай чон шокшым, яндар кава гай волгыдо кумылым.
(фотошто Светлана Мартьяновна одноклассник-влак коклаште)