Шкетан театр шке шочмо кечынже, 29 ноябрьыште, «Салика» спектакльым сценыште 900-шӧ гана модеш. Тидын вашеш Саликан образшым тӱрлӧ ийлаште чоҥышо актрисе-влакым музейыште иктеш чумырымо. Нунын дене вашлиймашке республикысе СМИ-ште ыштыше журналист-влак толыныт. С.Николаевын тиде пьесыже 1938 ий гыч тӱҥалын, чылаже латкок гана уэш шындалтын, тушто тӱҥ героиньым 18 актрисе модын. Вашлиймашке, мутат уке, пытартыш ийласе Салика-влак толыныт. Тиде Валентина Васильева, Марий Элын калык артисткыже-влак Светлана Гладышева, Антонина Антонова, Зинаида Долгова, Марий Элын сулло артисткыже Алина Егошина, Марина Воронцова да Светлана Александрова.
Тӱҥалтышлан «Саликам» шындыше режиссер-влак, Марий Эл искусствын сулло деятельже В.А.Пектеев ден РФ- сулло артистше В.В.Домрачев, пьесе дене пашам кузе ыштымышт нерген шарналтен ойленыт. А Саликам модшаш ончыкылык актрисым эше кажне гана у студийым тунемаш колташ погымо годымак кычалаш тӱҥалыт. Тидын годым ончыл верыш мотор шӱргывылыш дене пырля мурен кертме мастарлык, ӱдырын йӱкшӧ лектыт. Вет спектакльыште лачшымак муро дене Салика ончышын кумылжым налеш. Ты рольым чоҥышо артистке-влакат лач тидын нерген палемденыт. Вашлиймашымат нунын пырля муралтымышт дене мучашлыме.
Каласен кодыман, 29 ноябрьыште кӧ театрыш толын огеш керт гын, тудым онлайн йӧн дене кеч-могай кундемыште ончаш лиеш.
