Теве тыгай почеламут корнылажым налын Василий Пектеев шке лӱмгече концерт касшылан. Да жапшымат тидлан моткочак сылным ойырен. Тений шошо эр толмылан кӧра пушеҥгыште лышташат лектын шуктыш, эсогыл ломбо ден вишне пелед шогальыч. Садер лоҥгаште кайык муро оркестр чарныде йӱклана. А ты умыр кастене, 28 апрельыште, М.Шкетан театрын залже шыҥ-шыҥ калык дене темын шинче.
Марий Эл искусствын сулло деятельже, Марий Эл Кугыжаныш премийын лауреатше, М.Шкетан лӱмеш Марий драме театрын художественный вуйлатышыже В.А.Пектеев тений 23 январьыште вачӱмбакыже 70 ийым пыштыш. Тудын лӱмгечыжлан пӧлеклалтын ыле кум тылзе шуйнышо Пектеев фестиваль. Тудын кышкарыштыже пытартыш куд ий жапыште шындыме лу наре спектакльжым сценыште модын ончыктымо.
А лӱмгече касшым концерт программе дене палемдаш кумылаҥын. Вет Василий Александрович поэзийлан шӱман, 2010 ийыште «Омо» сборникым савыктен луктын. Икмыняр жап гыч почеламут корнылаже семым «муаш» тӱҥальыч. Икымше муро «Канде ӱжара» лийын. Тудлан семым але моткоч самырык музыкант-скрипач Татьяна Ямбердова возен. Мурен мутын авторжо шкеак. Тудо иканаште калык коклаш шарлен, йӧратыме мурыш савырнен.
Лӱмгече кастене лу наре муро ден тынарак почеламутшо сцене гыч йоҥгалтыч. Шуко мурыжын семже Татьяна Ямбердован, кок почеламут гыч музыкант, композитор Иван Егоров да Василий Пектеев шкеже семым возеныт.
Тиде концерт чылт Шкетан театрын вийже дене ышталтын. Муреныт РМЭ-н калык, РФ-н сулло артистше Иван Смирнов, РМЭ-н калык артистше-влак Роман Смирнов ден Светлана Строганова, самырык артист-влак Марина Воронцова ден Иван Соловьев. Музыкант-влак, РМЭ-н сулло артистше Евгений Сергеев ден Сергей Пчелкинат нунын радамыш ушненыт. Моткоч оҥай дуэт-влак шочыныт.
А муро коклаште почеламут-влакым РМЭ-н калык, РФ-н сулло артистше Олег Кузьминых, РМЭ-н сулло артистше Павел Ефимов, самырык актер Акпарс Иванов йоҥгалтареныт.
Сценыште йоҥгалтше муро да почеламут-влак моткочак келге шонымашан улыт ыле. Авторын йылмым шижын моштымыжлан, поян мутвундыжлан кеч-могай сылнымут мастар кӧранен кертеш.
Концерт программе деч вара сценыш саламлаш толшо-влак вӱдйогынла йогышт. Марий Элын культур, печать да калык-влакын пашашт шотышто министерстве лӱм дене министрын алмаштышыже М.Матвеев саламлыш. Вара вӱдышӧ Кугыжаныш Думын депутатше С.Казанковын саламлымашан телеграммыжым лудын пуыш. Саламлымашан телеграмме-влак Г.Камал лӱмеш Татар академический театр, Карелийысе национальный театр гыч толын. Карелийысе да Коми республикысе музыкально-драматический театрын коллективше-влак видео-саламлымашым колтеныт. А теве К.Иванов лӱмеш Чуваш академический театрын директоржо Е.В.Николаева шкежак толын. Чувашийысе да кӱшнӧ ончыктымо чыла театрлаште В.Пектеев шке жапыштыже режиссер семын ик спектакльым веле огыл шынден.
Морко кундем гыч поснак кугу делегаций толын. Нунын деке Йошкар-Олаште ты кундемысе землячестве ушнен. Василий Александрович – Морко кундемын шочшыжо. Кугешнат тудын дене ик мландыште шочшо-влак.
Тиде кастене кӧ саламлаш лектын гын, чыланат В.А.Пектеевын кӱкшӧ профессионал, шочмо йылмыжын да калыкшын патриотшо улмым, Марий театрым Россий кӱкшытыш лукмыжым палемденыт.
Эн мучашлан театр коллектив лӱмгече касын озажлан вучыдымо пӧлекым сценыш луктын. Тиде Шкетан театрын фасадшым сӱретлыман торт ыле. Тудын дене юбиляр чыла унажым сийлен.
