«Шӧртньӧ маскын» йошкар шартышыж дене

М.Шкетан лӱмеш Марий драме театрын «Гамлет. Машина. Цемент»  спектакльже  2022-2023 театр тургымышто ыштыме пашалан  «Шӧртньӧ маске» национальный театр премийым сеҥен налшаш-влак коклашке логалын ыле. Эксперт советын еҥже-влак  чылаже вич номинацийыште  куд еҥым таҥасыше-влак радамыш пуртеныт.  Тиде «Эн сай драматический спектакль», «Эн сай режиссер паша» (С.Пектеев), «Художник-постановщикын эн сай пашаже» (Е.Андреева), «Эн сай пӧръеҥ роль» (А.Тетерин, И.Соловьев), «Эн сай ӱдырамаш роль» (С.Александрова, С.Строганова). 24 июньышто тудым иктешленыт.

Тиде пайрем Е.Вахтангов лӱмеш театрын исторический залыштыже эртаралтын.  Мемнан режиссер ден артистна-влакат  почетан  йошкар шартыш мучко ошкыл эртеныт. Чаманен каласаш логалеш,  сценыш лекташ иктыжланат пиал шыргыжалын огыл. Но номинант-влак радамыш логалмак – нунылан кугу сеҥымаш! Шӱдӧ наре спектакль,  шӱдӧ дене актер-влак кокла гыч ойырен палемденыт, тиде чынжымак кугу ак.  Тиде тыгак театрлан – кугу сеҥымаш. Тудо усталык коллектив деч ончыкылан у кӱкшытым палемдаш йодеш.

Поделиться ссылкой:

Top