Тыге лӱмден М.Шкетан лӱмеш театрын артистше Марина Воронцова кугу пайрем концертшым. Тудым театр сценыште модмыжлан 10 ий, эстраде аланыште улмыжлан 11 ий да шканже 35 ий теммылан пӧлеклен.
Программым Марина «Шошо тольо» муро да тудлан сниматлыме клип дене почо. Лач тиде муро да Арина лӱм дене шке жапыштыже мурызо семын лекташ тӱҥалын. Продюсерже Андрей Герасимов лийын.
Икымше профессийже дене Марина Воронцова – вокалист. Драматический артист семын модмаштыжат тидым кумдан кучылтеш, шуко музыкальный спектакльыште тӱҥ рольым чоҥен да чоҥа. Тиде жапыштак муро репертуаржым пойдарен толеш. Тыге тудо кугу концертым эртараш ситыше погынен. Каласыман, концертыште лач эстраде муро гына йоҥген.
Концерт оза шкеже шуко мурен. У муро кокла гыч композитор Сергей Маков ден автор Зинаида Долгован возымо «Кадыргалын-кудыргалын» мурым палемдыман. Оҥай дуэт-влак йонгалтыныт. Коллегыже Иван Соловьев дене икмыняр мурым пӧлекленыт. РФ-н сулло артистше Иван Смирнов дене «Тый улат мыланем ныжыл йӱр», Марий Элын калык артистше Роман Алексеев дене «Мый тыйым кычальым», Наталья Алексеева дене «Снеге там» муро-влакым икымше гана колышташ пиал шыргыжале. Тыгак Чылдемыр кундемын мурызыжо Саша Иванов дене шочмо ялыштлан пӧлеклыме гимным йоҥгалтарышт (Г.Сабанцев-Ояр ден И.Егоров). Тудым калык поснак шокшын вашлийын. Тидлан ӧрман огыл, вет залыште тиде кастене Шернур кундем гыч шуко еҥ лийын. Район администраций лӱм дене культура пӧлкам вуйлатыше Ирина Казанцева саламлыш. «Земледелец» ял озанлык предприятий вуйлатыше Светлана Клепикова Марина Воронцова да шке кундемысе талантан чыла еҥ дене кугешнымыж нерген палемдыш.
Марина аваж ден ачажлан, вокал дене туныктышыжо Галина Шабруковалан тауштен, посна муро-влакым пӧлеклыш.
Кок ужаш гыч шогышо кугу концерт программе саламлаш толшыланат, лӱмгече озам саламлен мурышо-влакланат поян ыле.
Марина Воронцова таче муро аланыште шкенжын вержым пеҥгыдын налын манын каласаш чыла амал уло. Виян да чапле йӱкан тиде мурызо кеч-могай произведенийым сценыш луктын кертеш. Тидым икымше сольный концертше дене пеҥгыдемдыш. Тудо профессионально кугу кӱкшытыштӧ эртыш.