29 ноябрь – М.Шкетан лӱмеш Марий драме театрын шочмо кечыже. Ий еда тудо ойыртемалтшын палемдалтеш. Теният тыгак лие.
Эрдене усталык коллектив театрым йол ӱмбаке шогалтымашке кугу надырым пыштыше Яков Павлович Майоров-Шкетанын чапкӱжӧ воктек пеледышым пыштеныт. 106 ий жап эртыме корнышто лийше ойыртемалтше пале-влак нерген шарналтеныт.
16 шагатлан цех-залыште М.Булгаковын произведенийже негызеш шындыме «Записки юного врача» спектакльын премьерже лийын. Режиссер Р.Алексеевын йодмыж почеш прозо йылме гыч сценылан шындаш материалым С.Щеглов ямдылен.
Медицине теме кеч-могай жапланат келшен толеш. Кажне черле еҥ – тиде посна случай, сандене докторлан эмлыме йӧнжымат лач тудлан йӧршым ойырен моштыман. А тунемын гына лекше да мӱндыр кундемысе эмлымверыште пашам тӱҥалше врачлан мо дене гына вашлияш ок перне? Лач тидын нерген ойлалтеш «Записки юного врача» спектакльыште.
Ончышо тиде у пашам пеш шокшын вашлийын. Эше сценыш лектын шудеак, лишыл жаплан билетым налын пытареныт. Тугеже режиссер да театр калыкын йодмыжым шижын да умылен моштеныт.
Шочмо кечын пайрем касым Тыныш Осыпын «Закон шумлык» пьесыжым лудмаш дене мучашлыме. Лач тиде произведений почеш спектакльым 106 ий ончыч Сенькан школышто драмкружокыш коштшо артист-влак модыныт. Нунын дене туныктышо Иван Беляев пашам ыштен. Тышечын тӱҥалын театрын историйже.
Ты гана касыш толшо-влак кокымшо пачашыш сорта тул дене волгалтарыме тошкалтыш дене ӧрын-ӧрынрак кӱзеныт. Тыгайже але лийын огыл ыле – кузе от ӧр. Ала-кушто умбалне ӱдырамашын чон кӧргыж гыч лекше ойган сем шокта… Воштончышан фойеште ожынысо сурт кӧргӧ арвер-влак. Шуко сорта йӱла. Тошто олымбалеш вераҥыныт ончаш толшо-влак…
Театрализоватлыме лудмашым Марий Элын калык артистше Светлана Строганова ямдылен. Тышке театрын артистше-влак Елена Мочалова, Генрих Тимиряев, Светлана Скулкина, тыгак Республикысе культур да сымыктыш колледжысе актер группышто тунемше студент-влак ушненыт. Тиде лудмашым курым ончычсо жаплан лишыл улшо декораций, сем да муро келгемденыт.
Чынжымак тыглай огыл мероприятий эртаралтын ты кастене. Мучашлан лудмашыш ушнышо-влак иквереш Я.П.Майоров-Шкетанын чапкӱжӧ воктен войзалтыныт.
