Наталия Алексеева М.Шкетан лӱмеш Марий драме театрын труппышкыжо 2015 ийыште М.Щепкин лӱмеш кӱшыл театр училищым тунемын пытарыме деч вара ушнен. Теве ынде лу ий сценыш тӱрлӧ роль дене лектеш. Тынар ияк эстраде аланыште мура. Тыге усталык пашаште икымше ошкыл ышталтын манаш лиеш. Лач мурызо, мурылан мутым да семым возышо семын иктешлымашым ыштыш тудо 35 ийым темыме кечынже – 4 декабрьыште «Таче кечын улам пиалан» лӱман усталык касым эртарыш.
Тиде кастене шкеже шуко мурен. Тудлан йолташыже-влак полшеныт. Тӱҥ эҥертышыже училищыште пырля тунемше артист-влак лийыныт, тиде — Иван Соловьев, Марина Воронцова, Алексей Юнусов. Касын озаже тыгак Александр Речкин дене дуэт дене мурен. Лач тудо лу ий ончыч самырык артистым сценыш икымше гана мурызо семын луктын.
Наталия Алексеевам Морко кундемысе калык, администраций лӱм дене Марий Эл Кугыжаныш погын депутат Ю.Игнатьев, Йошкар-Олаште Морко землячествым вуйлатыше В.Андреев, Культур пашаеҥ-влак профсоюз реском вуйлатыше В.Ушнурцев, театрын администрацийже, профсоюз комитет саламленыт. Тыгак артистлан Республикысе тӱвыра да печать министерствын Чап таныкшым кучыктымо.
Но эн шерге ыле ачаж ден аважын ӱдырыштым сценыш кӱзен саламлымышт. Тидат веле огыл, Юрий Алексеевичын гармоньым шокталтымыж почеш Таисия Ивановна муралтенат колтыш. Лу ий жапыште Наталия рольым веле огыл поген шуктен, кок Александр пелашыж дене пырля кок эргым ыштен йол умбаке шогалтат. Эрге-влакын пеледыш аршашышт аван чонжым поснак ырыкта.
Тыгеракын ик тошкалтыш ышталтын. Тудо ончыкылан эшеат кугурак кукшытыш шуаш шукалтышым ышта манын шонымо шуэш.
