Шкетан театрыште – уэш Шекспир!

Режиссер Роман Алексеев моткоч уста тиде драматургын черетан комедийжым сценыш лукташ ямдыла. Тудо «Торешвате» маналтеш. Тыге кусарен Марий Элын калык поэтше Семен Николаев «Укрощение строптивой» пьесын лӱмжым марлашке.

Ончышо-влак эше «Кожла кокласе омо» спектакльымат сайын шарнат. Тудым В.Шекспирын «Сон в летнюю ночь» пьесыж почеш шындыме ыле. Калыклан тиде паша моткоч келшен, зал эре тичмаш лийын.

Ӱшанена, у спектакльым тыгаяк сеҥымаш вуча. Эртыше изарнян актер-влакын пашаштым ончымо деч вара тыгай ӱшан пеҥгыдеме. Премьерым февраль тӱҥалтыште вучыман. Кызыт вургемым ямдылыме паша умбакыже шуйна. А герой-влакын костюмышт моткоч чапле лийшаш улыт.
Шекспир – тиде эре тачысе кече! Тудо 400 ий жапыште Российысе театр-влакын репертуарышт гыч ик жапланат кораҥын огыл. Марий театрынат тыгай келге шогымашан авторым шындаш вийже да усталыкше сита!

Тугеже, премьерым изин-кугун вучаш тӱҥалына.

Валерий Тумбаевын фотожо.

Поделиться ссылкой:

© Шкетан театр - 2022

Top