М.Шкетан лӱмеш Марий драме театр 20 ноябрьыште сценыште «Кум ака-шӱжар» марий йомакым икымше гана модын ончыкта. Йошкар-Олаште илыше марий-влак, ме тушко эн ончычак тендам икшыве, уныкада дене вучена.
Тудо мемнан марла кутырен ок мошто але сайын ок умыло манын ида тургыжлане, йомак тудо – йомакак, действий гоч мо ышталтмым сайын умылаш лиеш. Мыланна весе шерге: икшыве кугу сцене гоч муро гай йоҥгалтше марий йылмынам колеш. Тек тудо ача-аважын, коча-коважын йылмыже сурт коклаште веле огыл, театрыштат кучылталтеш манын умыла. Каласыман, спектакль мурылан поян, артист-влак тудым ныжылге йӱкышт дене моткоч сылнын йоҥгалтарат. Сценографий гын чынжымак юзо йомак тӱняшке наҥгая. Тушто марийын жаплыме ош тӱсым кучылтмо, тидыже чонышто волгыдо шижмашым шочыкта.
Айста тиде каныш кечын Шкетан театрыш рӱжге погынен толына да шке икшывылан ме, марий-влак, шукын улына, шкем шке пагалыме, шочмо йылмым палаш, тунемаш кӱлеш манме шонымашым шыҥдарена.
Шкетан театр марий еш-влакым чумыра
